നല്ലകാര്യങ്ങൾക്ക് ഇറങ്ങി പുറപ്പെടുമ്പോൾ കരിമ്പൂച്ച കുറുകെ ചാടിയാൽ ദുശ്ശകുനമാണെന്നാണ് പൊതുവെയുള്ള വിശ്വാസം. ഇങ്ങനെ സംഭവിച്ചാൽ എന്തോ വലിയ കുഴപ്പം വരാനിരിക്കുന്നുവെന്ന ധാരണ വെച്ചു പുലർത്തുന്നവരാണ് ഏറെയും. ഇത്തരം സന്ദർഭങ്ങളിൽ യാത്ര മാറ്റിവെയ്ക്കുന്ന അവസ്ഥവരെ എത്തിയിട്ടുള്ള സംഭവവും നമുക്ക് അറിയാം. എന്നാൽ പലരും ഇവയെ അന്ധവിശ്വാസങ്ങളുടെ ഗണത്തിൽപ്പെടുത്തി തള്ളിക്കളയാറുമുണ്ട്. നല്ലകാര്യങ്ങൾക്ക് ഇറങ്ങുമ്പോൾ കറുത്ത പൂച്ച കുറുകെ ചാടിയാൽ പോകുന്ന കാര്യം നടക്കില്ലെന്നത് പണ്ടുമതൽക്കെയുള്ള വിശ്വസമാണ്. കരിമ്പൂച്ച എങ്ങനെയാണ് ദുശ്ശകുമായി മാറിയതെന്ന് നോക്കാം.
ഈജിപ്ഷ്യന്മാരുടെ 3000 ബിസി കാലഘട്ടവുമായാണ് കരിമ്പൂച്ചയുടെ ചരിത്രം ബന്ധപ്പെട്ട് കിടക്കുന്നത്. അക്കാലത്ത് പൂച്ചയെ ആരാധിച്ചവരായിരുന്നു അവർ. കറുത്ത പൂച്ചയെ കൊല്ലുന്നത് വധശിക്ഷ വരെ ലഭിക്കുന്ന കുറ്റമായിരുന്നു. എന്നാൽ മദ്ധ്യകാലകത്തോടെയാണ് കറുത്ത പൂച്ച ദുശ്ശകുനമായി മാറിത്തുടങ്ങിയത്. കരിമ്പൂച്ചയെ ദുശ്ശകുനമായി കണക്കാക്കാൻ തുടങ്ങിയത് യൂറോപ്യന്മാരാണ്.
കറുത്ത പൂച്ച കുറുകെ ചാടുന്നത് ദുശ്ശകുനമാണെന്ന കണ്ടെത്തൽ ഇംഗ്ലണ്ടിന്റെ സംഭാവനയാണ്. 1560കളിലെ ഇംഗ്ലീഷ് പഴങ്കകഥകളിലാണ് ഈ ദുശ്ശകുനം ആദ്യം കടന്നുവന്നത്. ഇതുമായി ബന്ധപ്പെട്ട് ഒരു ഐതീഹ്യവും നിലവിലുണ്ട്. ഒരിക്കൽ ഒരു അച്ഛനും മകനും യാത്രാ മധ്യേ ഒരു പൂച്ചയെ കണ്ടു. വഴിമുടക്കി നിന്ന പൂച്ചയെ ഇരുവരും കല്ലെറിഞ്ഞ് ഓടിച്ചു. തെരുവിലെ ഒരു വീട്ടിലേക്കാണ് ആ പൂച്ച ഓടിപോയത്. പ്രദേശത്ത് കുപ്രസിദ്ധി നേടിയ ദുർമന്ത്രവാദിനിയുടേതായിരുന്നു ആ വീട്.
പിറ്റേദിവസം അതേവഴിയിൽ നടക്കാനിറങ്ങിയ അച്ഛനും മകനും കാണാനിടയായത് കാലിൽ പരുക്കേറ്റ് മുടന്തി നടക്കുന്ന ദുർമന്ത്രവാദിനിയെ. കാര്യമന്വേഷിച്ചപ്പോൾ കറുത്ത പൂച്ചയെന്നാണ് ഉത്തരം ലഭിച്ചത്. അന്നുമുതലാണ് കറുത്ത പൂച്ചകളേയും ദുർമന്ത്രവാദത്തേയും ചേർത്തുള്ള കഥകളുടെ ആരംഭം. ഈ കഥ കാട്ടുതീ പോലെ ലോകമെങ്ങും പ്രചരിക്കുകയും ചെയ്തു. വാമൊഴിയിലൂടെ കഥയ്ക്ക് പല വ്യാഖ്യാനങ്ങളും ഉണ്ടായി. മന്ത്രവാദികൾ കറുത്ത പൂച്ചയുടെ വേഷത്തിൽ പ്രത്യക്ഷപ്പെടുമെന്നതിനാൽ സ്പാനിഷ് ജനത കറുത്ത പൂച്ചകളെ അകറ്റി നിർത്തുകയും ദുശ്ശകുനങ്ങളായി കണക്കാകുകയും ചെയ്തിരുന്നു.
ഇന്ത്യയിൽ ബ്രിട്ടീഷ് ആധിപത്യത്തിന് പിന്നാലെയാണ് ജനങ്ങൾ ഇത്തരം കെട്ടുകഥകൾക്ക് പിന്നാലെ പോകാൻ ആരംഭിച്ചത്. യാത്രക്കിടെ പൂച്ച കുറുകെ ചാടിയാൽ കാളകൾ ഉൾപ്പെടെയുള്ള മൃഗങ്ങൾ പരിഭ്രാന്തരാകുന്ന സംഭവം ഉണ്ടായിട്ടുണ്ട്. കരിമ്പൂച്ചയെ കേന്ദ്രീകരിച്ചുള്ള വിശ്വാസങ്ങളുടെ തുടക്കം രാജ്യത്ത് ഇങ്ങനെയാണെന്നാണ് കരുതപ്പെടുന്നത്. ബ്രിട്ടീഷ്, പോർച്ചുഗീസ് കോളനീവത്കരണ സമയത്ത് അതിരുകടന്നെത്തിയ കഥകളും ഇത്തരം വിശ്വാസങ്ങൾക്ക് കരുത്തേകി.
Comments