കോഴിക്കോട്: സിപിഎം സംഘടിപ്പിച്ച പ്രതിഷേധ സമരത്തിൽ പച്ചത്തെറി വിളിച്ച് പാർട്ടി
ജില്ലാ കമ്മറ്റിയംഗം. സിപിഎം കോഴിക്കോട് ജില്ലാ കമ്മിറ്റി അംഗം പി.കെ പ്രേംനാഥ് ആണ് വനിതകൾ ഉൾപ്പെടെ പങ്കെടുത്ത സമരത്തിൽ കേട്ടാൽ അറയ്ക്കുന്ന അസഭ്യവർഷം നടത്തിയത്. പെരുവയൽ പഞ്ചായത്ത് ഓഫീസിലേക്ക് നടത്തിയ പ്രതിഷേധ മാർച്ചിനിടെയായിരുന്നു സംഭവം.
പെരുവയൽ പഞ്ചായത്ത് അംഗം പികെ ഷറഫുദ്ദീനെതിരെ ആയിരുന്നു നേതാവിന്റെ അസഭ്യവർഷം. പ്രസംഗം മുഴുവൻ നേതാവ് ഇത്തരം വാക്കുകൾ കൊണ്ട് നിറയ്ക്കുകയായിരുന്നു. ആവേശം കൊണ്ട് അക്ഷരത്തെറ്റ് പറ്റിയതല്ലെന്നും ആവർത്തിച്ചുപറയുകയാണെന്നും പറഞ്ഞ് വീണ്ടും അസഭ്യവാക്കുകൾ ആവർത്തിക്കുകയും ചെയ്തു. പട്ടികജാതി വിഭാഗത്തെ ജാതീയമായി അധിക്ഷേപിക്കുന്ന അസഭ്യപ്രയോഗവും പ്രേംനാഥ് നടത്തി.
കഴിഞ്ഞ ദിവസം ജോലി തീർക്കാൻ പഞ്ചായത്ത് അംഗങ്ങൾ രാത്രിയിലും ചേംബറിൽ തുടർന്നത് ഡിവൈഎഫ്ഐ പ്രവർത്തകർ ചോദ്യം ചെയ്തതാണ് പ്രശ്നങ്ങൾക്ക് കാരണം. സ്ഥലത്തുണ്ടായിരുന്ന ഷറഫുദ്ദീൻ ഇക്കാര്യം ഡിവൈഎഫ്ഐക്കാരെ ബോധിപ്പിക്കേണ്ട കാര്യമില്ലെന്ന് മറുപടി നൽകി. ഇതിൽ പ്രതിഷേധിച്ചായിരുന്നു മാർച്ച്. പ്രേംനാഥിന്റെ പ്രസംഗം റിപ്പോർട്ട് ചെയ്ത ദൃശ്യമാദ്ധ്യമങ്ങൾ അത് പുറത്തുവിടാൻ കഴിയാത്തതിനാൽ ഒഴിവാക്കുകയായിരുന്നു. .
നേരത്തെ പ്രേംനാഥ് ബിജെപിയുടെ ധീരബലിദാനിയായ കെ.ടി ജയകൃഷ്ണൻ മാസ്റ്ററിനെക്കുറിച്ച് പ്രസംഗിച്ചതും വിവാദമായിരുന്നു.
