മൂക്ക് ചെത്തി, നാക്ക് പിളർത്തി, വിരലുകൾ മുറിച്ച് യുവാവ്; അന്യഗ്രഹ ജീവിയെ പോലെയാകുക ലക്ഷ്യം

ശരീരത്തെ രൂപമാറ്റം വരുത്തുകയെന്നത് ഒരു പുതിയ കാര്യമല്ല. തടി കൂട്ടിയും കുറച്ചും ശരീര ഭാഗങ്ങൾ കൂടുതലായി വെച്ചുപിടിപ്പിച്ചുമെല്ലാം മനുഷ്യർ പലവിധ ശസ്ത്രക്രിയകൾ നടത്താറുണ്ട്. ബാർബി ഡോളിനെ പോലെ രൂപമാറ്റം വരുത്തുന്ന വിദേശ വനിതകൾ പലപ്പോഴും വാർത്തകളിൽ ഇടംപിടിക്കുകയും ലോക പ്രശസ്തമാകുകയും ചെയ്തിട്ടുണ്ട്. എന്നാൽ നാം ഇന്നുവരെ കണ്ട രൂപമാറ്റ ശസ്ത്രക്രിയകളിൽ നിന്നെല്ലാം വ്യത്യസ്തത പുലർത്തി ഒരാൾ പ്രസിദ്ധിയാർജിച്ചിരിക്കുകയാണ്. ഫ്രാൻസിലെ ആന്റണി ലോഫ്രെഡോ..

ഒറ്റ നോട്ടത്തിൽ ആരും പേടിച്ചുപോകുന്ന രൂപത്തിലേക്കാണ് ആന്റണി ലോഫ്രെഡോ ശസ്ത്രക്രിയയിലൂടെ മാറിയത്. തന്നെ കണ്ടാൽ അന്യഗ്രഹ ജീവിയെ പോലെ തോന്നണമെന്നാണ് ആന്റണിയുടെ ആഗ്രഹം. 33കാരനായ ഇയാൾ തന്റെ ജീവിത ലക്ഷ്യം പൂർത്തീകരിക്കുന്നതിനായി ചെയ്തത് ആരെയും അതിശയിപ്പിക്കുന്ന പ്രവൃത്തികളാണ്.

കൃഷ്ണമണി ഉൾപ്പെടെയുള്ള ശരീരഭാഗങ്ങൾ ടാറ്റു ചെയ്തു കഴിഞ്ഞ ആന്റണി തന്റെ നാവിനെ രണ്ടായി പിളർത്തി. മൂക്കിന്റെ അഗ്രം മുറിച്ചു. മേൽചുണ്ടിന്റെ ഒരു ഭാഗം എടുത്തുകളഞ്ഞു. തലയിൽ മുഴകളും കുഴികളും ഉണ്ടാക്കി. ഇതെല്ലാം ചെയ്തിട്ട് കുറച്ച് നാളുകളായി. ഏറ്റവും ഒടുവിൽ ചെയ്ത സാഹസം കൈകളിലെ രണ്ട് വിരലുകൾ ചെത്തികളഞ്ഞതാണ്. കഴിഞ്ഞ ദിവസം നടന്ന ശസ്ത്രക്രിയയിലൂടെ ഇടതു കയ്യിലെ വിരലുകളാണ് മുറിച്ചുമാറ്റിയത്. അടുത്ത് തന്നെ വലതുകയ്യിലും ഇത് പ്രാവർത്തികമാക്കുമെന്ന് ആന്റണി പറഞ്ഞു.

തന്റെ ഈ പ്രവൃത്തികൾക്കെല്ലാം ആന്റണി ഒരു പേരിട്ടിട്ടുണ്ട്. ബ്ലാക്ക് ഏലിയന്റ് പ്രോജക്ട് എന്നാണത്. ഇൻസ്റ്റഗ്രാമിലൂടെ ശസ്ത്രക്രിയയെക്കുറിച്ചുള്ള പുതിയ വിവരങ്ങൾ ആന്റണി അപ്പപ്പോൾ പങ്കുവെക്കാറുണ്ട്. നിരവധി ഫോളോവേഴ്‌സുള്ള ആന്റണിയുടെ രൂപമാറ്റ ശസ്ത്രക്രിയ എന്നും വിവാദമായിരുന്നു. അനുകൂലിച്ചും പ്രതികൂലിച്ചും നിരവധി പേർ എത്തുകയും പതിവാണ്.

പല രാജ്യങ്ങളിലും ശരീര ഭാഗങ്ങൾ മുറിച്ചുമാറ്റുന്നത് നിയമവിരുദ്ധമാണെന്നത് ആന്റണിക്ക് ചെറിയ വെല്ലുവിളി ഉയർത്തിയിട്ടുണ്ട്. ഇത്തരത്തിലുള്ള നിയമങ്ങൾ ഫ്രാൻസിലും നിലനിൽക്കുന്നതിനാൽ സ്‌പെയിനിലെത്തിയാണ് മൂക്കിന്റെ അഗ്രം ചെത്തികളഞ്ഞത്. ചുണ്ടിന്റെ ഒരു ഭാഗം അടർത്തി കളഞ്ഞതിന് ശേഷം സംസാരിക്കാൻ അൽപം ബുദ്ധിമുട്ടുണ്ടെന്നും ആന്റണി പറയുന്നു.

അന്യഗ്രഹ ജീവിയാകുന്നതിന് ആന്റണിയുടെ പോരാട്ടങ്ങൾ അവസാനിച്ചിട്ടില്ല. ശരീരം മെറ്റലിന് സമാനമാക്കുകയാണ് അടുത്ത ലക്ഷ്യം. ഇിതനായി ശരീരത്തിലെ ചർമം മുഴുവൻ നീക്കം ചെയ്യുമെന്നും ആന്റണി അറിയിച്ചു. സാഹസങ്ങൾ വിനോദമാക്കുന്ന ഈ ചെറുപ്പക്കാരൻ നിരവധിയാളുകൾക്ക് ഉത്തരം കിട്ടാത്തൊരു ചോദ്യമാണ്.