കോഴിക്കോട്: സംസ്ഥാനത്തെ എല്ലാ പോലീസ് സ്റ്റേഷനുകളിലേക്കും ഭീതിയില്ലാതെ കയറിചെല്ലാനാകണമെന്ന് വനിത കമ്മീഷൻ അദ്ധ്യക്ഷ പി.സതീദേവി. പോലീസുകാർക്ക് ലിംഗനീതി സംബന്ധിച്ച പരിശീലനം കൊടുക്കണമെന്ന് നിർദ്ദേശം നൽകിയിട്ടുണ്ടെന്ന് പി. സതീദേവി കൂട്ടിച്ചേർത്തു.
എല്ലാ സ്റ്റേഷനുകളും ജനമൈത്രി പോലീസ് സ്റ്റേഷനുകളാക്കി മാറ്റാനുള്ള നടപടി സ്വീകരിക്കണമെന്ന് മുഖ്യമന്ത്രിയോട് ആവശ്യപ്പെട്ടിട്ടുണ്ടെന്ന് സതീദേവി വ്യക്തമാക്കി.മൊഫിയ പർവീണെന്ന നിയമ വിദ്യാർത്ഥിനി ആത്മഹത്യ ചെയ്ത പശ്ചാത്തലത്തിലാണ് വനിതാ കമ്മീഷൻ അദ്ധ്യക്ഷയുടെ പ്രതികരണം.
സ്ത്രീവിരുദ്ധമായ സമീപം പൊതുസമൂഹത്തിൽ നിലനിൽക്കുന്ന അന്തരീക്ഷത്തിലാണ് നാം ജീവിക്കുന്നത്. ഇത് പോലീസ് സംവിധാനത്തെയും ബാധിക്കുന്നു.ആരോപണ വിധേയനായ സി.ഐക്കെതിരെ നിരവധി പരാതികൾ ഉയർന്ന് വന്നിട്ടുണ്ട്. നിലവിൽ മൊഫിയയുടെ മരണത്തിൽ വനിതാ കമ്മീഷൻ കേസ് എടുത്തിട്ടില്ലെ. സംഭവം പരിശോധിച്ച് വരികയാണെന്ന് സതീദേവി വ്യക്തമാക്കി.
