കോഴിക്കോട്: എല്ലാ അദ്ധ്യാപകരും വാക്സിൻ എടുക്കണമെന്ന് മുസ്ലീം ലീഗ്. കുട്ടികളെ അപകടത്തിലാക്കരുതെന്നും സർക്കാർ നിർദ്ദേശം പാലിക്കണമെന്നും മുസ്ലീം ലീഗ് ജനറൽ സെക്രട്ടറി കുഞ്ഞാലിക്കുട്ടി പറഞ്ഞു.
വാക്സിനെടുക്കാത്ത അദ്ധ്യാപകരുടെ പേര് വിവരങ്ങളടക്കം വെളിപ്പെടുത്തുമെന്നും പൊതുസമൂഹം ഇവരെ തിരിച്ചറിയട്ടെയെന്നും ഇന്ന് മന്ത്രി വി ശിവൻ കുട്ടി പറഞ്ഞിരുന്നു. ഇതിന് പിന്നാലെയാണ് ലീഗിന്റെ ആഹ്വാനം. ഇന്ന് ഉച്ചയോടെയാണ് സംസ്ഥാനത്ത് വാക്സിൻ എടുക്കാത്ത 5000 ഓളം അദ്ധ്യാപകരുടെ വിവരങ്ങൾ പുറത്ത് വിടുക.
അതേ സമയം വഖഫ് വിഷയത്തിൽ പ്രക്ഷോഭം ശക്തമാക്കുമെന്ന് ലീഗ് വ്യക്തമാക്കി.വഖഫ് ബോർഡിലെ ജീവനക്കാരുടെ നിയമനം പി.എസ്.സിക്ക് വിട്ട സർക്കാർ തീരുമാനത്തിനെതിരെ പ്രക്ഷോഭത്തിന് ഒരുങ്ങുമെന്നാണ് ലീഗ് വ്യക്തമാക്കിയത്.നിയമനം പിഎസ്സിക്ക് വിട്ട നടപടി കേരളത്തിൽ മാത്രമല്ല രാജ്യത്താകെ പ്രത്യാഘാതമുണ്ടാകുമെന്നും നിലപാടിൽ വിട്ടുവീഴ്ചയ്ക്കില്ലെന്നും ലീഗ് വ്യക്തമാക്കി. ഈ മാസം ഒൻപതിന് കോഴിക്കോട് വഖഫ് സംരക്ഷണ സമ്മേളനം നടത്താനാണ് മുസ്ലീം ലീഗ് തീരുമാനം.
