ഹൈദരാബാദ്: രാജ്യത്ത് ഡ്രൈവിംഗ് ലൈസൻസ് നേടുന്ന ആദ്യ ഉയരം കുറഞ്ഞ മനുഷ്യനായി ഹൈദരാബാദ് സ്വദേശി. 42കാരനായ ഗത്തിപല്ല്യ ശിവപാലാണ് ഈ നേട്ടം കൈവരിച്ചിരിക്കുന്നത്. വെറും മൂന്നടിയോളം ഉയരം മാത്രമാണ് ശിവപാലിനുള്ളത്. തന്റെ ജില്ലയിൽ ദിവ്യാംഗനായി ബിരുദം പൂർത്തിയാക്കിയ ആദ്യ വ്യക്തികൂടിയാണ് ശിവപാൽ.
ജോലി സ്ഥലത്തേയ്ക്ക് ബസിലും ട്രെയിനിലുമൊക്കെ പോകാൻ ഒരുപാട് ബുദ്ധിമുട്ട് അനുഭവിച്ചിരുന്നു. യാത്രക്കിടെ നിരവധി പേർ കളിയാക്കി ചിരിച്ചു. അങ്ങനെയിരിക്കെയാണ് പൊക്കക്കുറവുള്ള ഒരു അമേരിക്കക്കാരൻ വണ്ടി ഓടിക്കുന്ന വീഡിയോ കാണുന്നതെന്നും ആ വീഡിയോയാണ് തന്നെ ഡ്രൈവിംഗ് പഠിക്കാൻ പ്രേരിപ്പിച്ചതെന്നും ശിവപാൽ വ്യക്തമാക്കി.
ഡ്രൈവിംഗ് പഠിക്കാൻ പലയിടത്തും ശിവപാൽ ചെന്നിരുന്നു. എന്നാൽ പൊക്കക്കുറവിന്റെ പേരിൽ പലരും കളിയാക്കി തിരിച്ചയക്കുകയായിരുന്നു. എന്നാലിപ്പോൾ ശിവപാലിന്റെടുത്ത് നിന്നും നിന്നും ഡ്രൈവിംഗ് പഠിക്കാൻ നിരവധി പേരാണ് എത്തിയിരിക്കുന്നത്. ശാരീരിക വൈകല്യമുള്ളർക്ക് പഠിക്കാനായി അടുത്ത വർഷം ഒരു ഡ്രൈവിംഗ് സ്കൂൾ ആരംഭിക്കാൻ തീരുമാനിച്ചിരിക്കുകയാണ് അദ്ദേഹം.
ലിംക ബുക്ക് ഓഫ് റെക്കോഡ്സ് അടക്കം പല റെക്കോർഡുകളിലേക്കും തന്റെ പേര് ഇന്ന് നോമിനേറ്റ് ചെയ്തിട്ടുണ്ട്. അപൂർവ്വ നേട്ടത്തിന് പിന്നാലെ നിരവധി പേർ ഡ്രൈവിംഗ് പഠിക്കാൻ സമീപിച്ചിട്ടുണ്ടെന്ന് ശിവപാൽ തന്നെയാണ് വ്യക്തമാക്കിയത്. കൂടുതലും പൊക്കം കുറവുള്ളവരാണ് തന്നെ സമീപിച്ചിരിക്കുന്നത്. നിരവധി പേരുടെ പരിഹാസമാണ് തന്നെ ഈ നിലയിൽ എത്തിച്ചതെന്നും ശിവപാൽ പറയുന്നു.
Comments