കാക്കനാട്: കാക്കനാട് എം.ഡി.എം.എ കേസിൽ ഒളിവിലുള്ള പ്രതികൾക്കായി എക്സൈസ് ലുക്കൗട്ട് നോട്ടീസ്. കോഴിക്കോട് സ്വദേശി ഹിലാൽ മിഥുലാജിനെതിരെയാണ് നോട്ടീസ് ഇറക്കിയത്. ഇയാൾ ദോഹയിലേക്ക് കടന്നതായാണ് വിവരം. രണ്ട് പ്രതികൾക്കെതിരെ കൂടി ഉടൻ ലുക്കൗട്ട് നോട്ടീസ് പുറത്തിറക്കും. ഷാരൂഖ് സഹൽ, ഇയാളുടെ സുഹൃത്ത് എന്നിവർക്കെതിരെയാണ് ലുക്കൗട്ട് നോട്ടീസ് ഇറക്കുന്നത്. 21 പ്രതികളുള്ള കേസിൽ ഉടൻ കുറ്റപത്രം സമർപ്പിക്കുമെന്നും പോലീസ് വ്യക്തമാക്കി. ഇതിൽ മൂന്ന് പേർ സ്ത്രീകളാണ്.
കേസിൽ കൂടുതൽ പ്രതികളുണ്ടെന്ന് അന്ന് തന്നെ അന്വേഷണ സംഘം വ്യക്തമാക്കിയിരുന്നു. ഒരു യുവതി ഉൾപ്പെടെ ചിലരെ എക്സൈസ് ജില്ലാഘടകം കേസിൽ നിന്നും ഒഴിവാക്കിയതായുള്ള ആരോപണങ്ങൾ ശക്തമായിരുന്നു. ഇതിന് പിന്നാലെയാണ് എക്സൈസ് ക്രൈംബ്രാഞ്ച് കേസ് ഏറ്റെടുത്തത്. എം.ഡി.എം.എ ഉൾപ്പെടെ മാരക ലഹരിമരുന്നുകളാണ് ഇവരിൽ നിന്നും പിടികൂടിയത്. ഇതിൽ ആർക്കും ഇതുവരെ ജാമ്യം ലഭിച്ചിട്ടില്ല. ഹിലാൽ ഉൾപ്പെടെ മൂന്ന് പേരാണ് കേസിൽ ഇനി പിടിയിലാകാനുള്ളത്.
