മരക്കാർ അറബിക്കടലിന്റെ സിംഹം കണ്ടതിന് ശേഷം ചിത്രത്തെക്കുറിച്ച് പങ്കുവച്ച പോസ്റ്റിന് താഴെ വിമർശന കമന്റിട്ട ആൾക്ക് ചുട്ട മറുപടി നൽകി സിജു വിത്സൻ. വിമർശകന്റെ കമന്റും അതിന് സിജു വിത്സൻ നൽകിയ മറുപടിയും പ്രേക്ഷകരും ചർച്ചയാക്കിയിരിക്കുകയാണ്. ‘ മരക്കാർ എന്നിലെ പ്രേക്ഷകനെ തൃപ്തിപ്പെടുത്തി. തിയേറ്റർ എക്സ്പീരിയൻസ് മിസ് ചെയ്യരുത്’ എന്നുമായിരുന്നു സിജു ചിത്രം കണ്ടതിന് ശേഷം ഫെയ്സ്ബുക്കിൽ കുറിച്ചത്. ‘സ്റ്റാന്റ് വിത്ത് ഗുഡ് സിനിമ’ എന്ന ഹാഷ് ടാഗും സിജു ഇതോടൊപ്പം പങ്കുവച്ചിട്ടുണ്ട്.
എന്നാൽ ‘ ആന്റണി സാർ ടൈപ്പ് ചെയ്ത് തന്നതാണോ ബ്രോ’ എന്നതായിരുന്നു സിജുവിന്റെ പോസ്റ്റിന് താഴെ വന്ന വിമർശനം. ‘ പുള്ളിക്കൊന്നും അതിനുള്ള നേരമില്ല ബ്രോ, പുള്ളി അവിടെ ക്യാഷ് എണ്ണിക്കൊണ്ടിരിക്കുവായിരിക്കും. പിന്നെ എനിക്ക് ടൈപ്പിങ് അറിയാവുന്നത് കൊണ്ടും, എന്നിലെ പ്രേക്ഷകന്റെ അഭിപ്രായം രേഖപ്പെടുത്താനുള്ള അറിവും ബോധവും എനിക്കുള്ളത് കൊണ്ടും, തത്കാലം ആരുടേയും സഹായം എനിക്കാവശ്യമില്ല’ എന്നായിരുന്നു സിജുവിന്റെ മറുപടി. സിജുവിന്റെ ഈ കമന്റ് പ്രേക്ഷകർ ഏറ്റെടുത്തിരിക്കുകയാണ്.
ചിത്രം ഇറങ്ങിയതിന് പിന്നാലെ ചിത്രത്തിനെതിരെ വലിയ രീതിയിൽ കുപ്രചരണങ്ങൾ നടന്നിരുന്നു. ചിത്രത്തിന്റെ വ്യാജ പതിപ്പ് ഇറക്കിയ ഒരാളെ പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു.
