ഇസ്ലാമാബാദ് : യാത്രയ്‌ക്കിടെ ട്രെയിൻ ചിലയിടങ്ങളിൽ പിടിച്ചിടുന്നത് സാധാരണയാണ്. അതിനു പിന്നിൽ എന്തെങ്കിലും സാങ്കേതിക കാരണങ്ങളുമുണ്ടാകും . എന്നാൽ പാകിസ്താനിലെ ലോക്കോ പൈലറ്റ് ട്രെയിൻ നിർത്തിയതിനു പിന്നിലെ അത്യാവശ്യ കാരണം തൈര് വാങ്ങുക എന്നതായിരുന്നു . സംഭവം പുറത്തറിഞ്ഞതോടെ, ലോക്കോപൈലറ്റിനെയും, സഹായിയെയും അധികൃതര്‍ സസ്‌പെന്‍ഡ് ചെയ്തു. ഡ്രൈവർ റാണാ മുഹമ്മദ് ഷെഹ്‌സാദിനെയും സഹായിയേയുമാണ് സസ്പെൻഡ് ചെയ്തത് .
പ്രവിശ്യാ തലസ്ഥാനത്തെ കഹ്‌ന കച്ച റെയിൽവേ സ്റ്റേഷന് സമീപത്ത് വച്ചാണ് ട്രെയിൻ നിർത്തിയിട്ടത് . തൈര് വാങ്ങുന്നതിനായി ട്രെയിൻ നിർത്തുന്നതിന്റെ വീഡിയോ സോഷ്യൽ മീഡിയയിൽ വൈറലായതിനെ തുടർന്ന് റെയിൽവേ മന്ത്രി അസം ഖാൻ സ്വാതി ഡ്രൈവറെയും സഹായിയെയും സസ്‌പെൻഡും ചെയ്തു. പാക് റെയിൽവേ ലാഹോർ ഭരണകൂടത്തോട് സസ്പെൻഡ് ചെയ്യാൻ ഉത്തരവിടുകയും ചെയ്തു.
അപകടങ്ങൾ, യാത്രക്കാരുടെ സുരക്ഷ, വരുമാനത്തകർച്ച തുടങ്ങിയ വിവിധ പ്രശ്‌നങ്ങൾ കാരണം ഏറെ ബുദ്ധിമുട്ടുന്ന റെയിൽവേ വകുപ്പിനെതിരെ രൂക്ഷമായ വിമർശനം ക്ഷണിച്ചുവരുത്തുന്നതായി മാറി പുതിയ വീഡിയോ ക്ലിപ്പ് . .ഭാവിയിൽ ഇത്തരം സംഭവങ്ങൾ വെച്ചുപൊറുപ്പിക്കില്ലെന്നും ദേശീയ സ്വത്തുക്കൾ സ്വകാര്യ ആവശ്യങ്ങൾക്കായി ഉപയോഗിക്കാൻ ആരെയും അനുവദിക്കില്ലെന്നും മന്ത്രി പ്രസ്താവനയിൽ മുന്നറിയിപ്പ് നൽകി. ട്രെയിനിലെ ക്രൂ അംഗങ്ങളെ നിരീക്ഷിക്കാനും ആരെങ്കിലും ഉത്തരവുകൾ ലംഘിക്കുന്നുണ്ടെങ്കിൽ ഉടനടി നടപടിയെടുക്കാനും അതാത് ഡിവിഷണൽ മേധാവികൾക്ക് നിർദ്ദേശം നൽകിയിട്ടുണ്ട്
Comments