ദുബായ് : ചുരുളി സിനിമ ആവശ്യപ്പെടുന്നതാണ് അതിലെ സംഭാഷണങ്ങളെന്ന് നടൻ ചെമ്പൻ വിനോദ്. തെറി വിറ്റ് കാശാക്കാൻ ഉദ്ദേശിച്ചിട്ടില്ല. സിനിമയിലെ കഥാപാത്രങ്ങൾ കുറ്റവാളികളാണ്. ഇവരുടെ രീതിയാണ് ചിത്രത്തിൽ അവതരിപ്പിച്ചതെന്നും ചെമ്പൻ വിനോദ് പറഞ്ഞു. ചുരുളിയിലെ തെറിവിളിയുമായി ബന്ധപ്പെട്ട വിവാദങ്ങൾ പുകയുന്നതിനിടെയാണ് ചെമ്പൻ വിനോദിന്റെ പ്രതികരണം.
സിനിമ തുടങ്ങുമ്പോൾ തന്നെ മുതിർന്നവർക്ക് കാണാനുള്ളതാണെന്ന് വ്യക്തമാക്കുന്നുണ്ട്. കുട്ടികളെപ്പറ്റി ആശങ്കപ്പെടുന്നവർ ഇത് വായിച്ച ശേഷമാണ് സിനിമ കാണേണ്ടത്. സിനിമ ആവശ്യപ്പെടുന്നതാണ് അതിലെ സംഭാഷണങ്ങൾ. കുറ്റവാളികൾ താമസിക്കുന്ന സ്ഥലത്തുള്ളവർക്ക് അവരുടേതായ രീതിയുണ്ട്. ഇതാണ് സിനിമയിൽ ചിത്രീകരിച്ചതെന്നും ചെമ്പൻ വിനോദ് പറഞ്ഞു.
എല്ലാ നിയമങ്ങളും പാലിച്ചാണ് സിനിമ ഒടിടിയിൽ റിലീസ് ചെയ്തത്. വിരൽ തുമ്പിൽ എല്ലാം ലഭിക്കുന്ന കാലമാണ് ഇപ്പോൾ. അതിനാൽ ചുരുളി എന്ന സിനിമയെടുത്ത് പുതുതലമുറയെ നശിപ്പിക്കേണ്ട ആവശ്യമില്ല. സിനിമ കണ്ട് നശിക്കുന്നവരാണെങ്കിൽ ആ തലമുറയെക്കൊണ്ട് പ്രയോജനമില്ലെന്നാണ് കരുതുന്നതെന്നും അദ്ദേഹം വ്യക്തമാക്കി.
