സിഡ്‌നി: ആഷസ്സ് പരമ്പരയിലെ അഞ്ചാമത്തേതും അവസാനത്തേതുമായ ടെസ്റ്റ് പകൽ-രാത്രി മത്സരമാകുമെന്ന് ഉറപ്പായി . ക്രിക്കറ്റ് ഓസ്‌ട്രേലിയയാണ് തീരുമാനം പ്രഖ്യാപിച്ചത്. ഹൊബ്ബാർട്ടിൽ ജനുവരി 14നാണ് ടെസ്റ്റ് ആരംഭിക്കുന്നത്.
ടാസ്മാനിയ മേഖലയിലാണ് ഹൊബ്ബാർട്ട് ക്രിക്കറ്റ് മൈതാനം. ഇത് ക്രിക്കറ്റ് ആരാധകർക്കുള്ള ക്രിസ്തുമസ്സ് സമ്മാനമെന്നാണ് ക്രിക്കറ്റ് ഓസ്‌ട്രേലിയ അവകാശപ്പെടുന്നത്. പെർത്തിൽ നടത്താനിരുന്ന ടെസ്റ്റാണ് സ്ഥലം മാറ്റി നിശ്ചയിച്ചത്. കൊറോണ മാനദണ്ഡങ്ങളും ക്വാറന്റൈൻ നിയന്ത്രണവും പ്രഖ്യാപിച്ച തെക്കൻ ഓസ്‌ട്രേലിയ പ്രവിശ്യയുടെ നിർബന്ധം കാരണമാണ് വേദി മാറ്റിയത്. 2016 ന് ശേഷം ആദ്യമായാണ് ഹൊബ്ബാർട്ടിൽ ഒരു ടെസ്റ്റ് മത്സരം അരങ്ങേറാൻ പോകുന്നത്.
ഈ വർഷം അഫ്ഗാനിസ്താൻ പര്യടനം നിശ്ചയിച്ചത് ആദ്യം ഹൊബ്ബാർട്ടിലായിരുന്നു. താലിബാൻ അഫ്ഗാൻ പിടിച്ചതോടെയാണ് പര്യടനം റദ്ദാക്കേണ്ടി വന്നത്. ആദ്യ ടെസ്റ്റ് നിലവിൽ ബ്രിസ്‌ബെയിനിൽ നാലാം ദിവസത്തിലേക്ക് കടന്നിരിക്കുകയാണ്.
