തിരുവനന്തപുരം: പാചകവാതക സിലിണ്ടറിൽ നിന്നും ഗ്യാസ് ചോർന്നുള്ള അപകടത്തിൽ ഗുരുതരമായി പൊള്ളലേറ്റ് ചികിത്സയിലായിരുന്ന വീട്ടമ്മ മരിച്ചു. മഞ്ഞപ്പാറ ഉമേഷ് ഭവനിൽ സുമി(32) ആണ് മരിച്ചത്. കഴിഞ്ഞ ബുധനാഴ്ച്ച രാവിലെ ആറരയോടുകൂടിയായിരുന്നു അപകടം ഉണ്ടാകുന്നത്.
ചായയുണ്ടാക്കുന്നതിനായി രാവിലെ അടുക്കളയിലെത്തിയ സുമി ഫ്രഡ്ജ് തുറന്നപ്പോൾ തീ ആളിപ്പടരുകയായിരുന്നു. കരച്ചിൽ കേട്ടെത്തിയ വീട്ടുകാർ പൊള്ളലേറ്റ സുമിയെ ഉടൻ തന്നെ തിരുവനന്തപുരത്തെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. തുടർന്ന് ചികിത്സയിൽ കഴിഞ്ഞിരുന്ന യുവതിയുടെ ആരോഗ്യ നില ഇന്ന് രാവിലെയോടെ വഷളാവുകയായിരുന്നു.
അപകടകാരണം കണ്ടെത്താനായി സുരക്ഷാ വിഭാഗം വീട്ടിൽ പരിശോധന നടത്തിയിരുന്നു. ഗ്യാസ് സിലിണ്ടറിൽ നിന്നും അടുപ്പിലേക്ക് ഘടിപ്പിച്ചിരുന്ന റബ്ബർ ട്യൂബ് എലി കരണ്ടതായി പരിശോധനയിൽ കണ്ടെത്തി. ഇതിലൂടെ ഗ്യാസ് ചോർന്നാണ് അപകടമുണ്ടായത്. ഇത്തരം അപടകങ്ങൾ ഒഴിവാക്കാൻ റബ്ബർ ട്യൂബുകൾ ഒഴിവാക്കി കട്ടിയുള്ള ട്യൂബുകൾ ഗ്യാസ് സിലിണ്ടറിൽ ഘടിപ്പിക്കണമെന്ന് സുരക്ഷാ ഉദ്യോഗസ്ഥർ അറിയിച്ചു.
Comments