കൊച്ചി: കെട്ടിടനിർമ്മാണ സാമഗ്രികളുടെ വില അനുദിനം കുതിച്ചുയരുന്നു. കൊറോണ പ്രതിസന്ധിയിൽ നിന്നു കരകയറുന്നതിനിടെയാണ് നിർമ്മാണ സാമഗ്രികളുടെ വിലയും ക്രമാതീതമായി ഉയരുന്നത്. ഇത് കെട്ടിടനിർമ്മാണ മേഖലയെ ആകെ പ്രതിസന്ധിയിലാക്കിയിരിക്കുകയാണ്.
കല്ല്, സിമന്റ്, മെറ്റൽ കട്ട, ചുടുകട്ട, കമ്പി, ടൈൽ തുടങ്ങിയവയ്ക്കും പ്ലംബിംഗ് സാമഗ്രികൾക്കും പെയിന്റിനും വില കുതിച്ചുയരുകയാണ്. അസംസ്കൃത വസ്തുക്കളുടെ ദൗർലഭ്യമാണ് വിലയക്കയറ്റത്തിന് കാരണം. വയർ, പവർ കേബിൾ എന്നിവയ്ക്ക് 50 ശതമാനം വരെ വിലകൂടി.
കോപ്പർ, സ്റ്റിൽ സാമഗ്രികൾ, ആംഗിൾസ്, ഷീറ്റ്, സ്വിച്ച് ബോർഡ് എന്നിവയ്ക്ക് 15-25 ശതമാനം വരെ വില കൂടി. അതേസമയം സിമന്റ് വിലയും സമീപകാലത്ത് വർദ്ധിച്ചിരുന്നു. കൽക്കരി ക്ഷാമത്തെ തുടർന്നായിരുന്നു അത്. കൽക്കരി വില കുറഞ്ഞപ്പോൾ സിമന്റ് വിലയും കുറഞ്ഞ് തുടങ്ങിയിരുന്നു.
