അമരാവതി: ഹെലികോപ്ടർ ദുരന്തത്തിൽ ജീവൻ പൊലിഞ്ഞ ലാൻസ് നായിക് സായി തേജയുടെ കുടുംബത്തിന് ധനസഹായം പ്രഖ്യാപിച്ച് ആന്ധ്രാപ്രദേശ് സർക്കാർ. 50 ലക്ഷം രൂപ ധനസഹായമാണ് പ്രഖ്യാപിച്ചത്. കൂടാതെ കുട്ടികളുടെ വിദ്യാഭ്യാസ ചെലവും സർക്കാർ ഏറ്റെടുത്തു. മന്ത്രി ആർ. രാമചന്ദ്രറെഡ്ഡി തേജയുടെ കുടുംബത്തിലെത്തി ചെക്ക് കൈമാറും.
സായി തേജയുടെ ഭാര്യക്ക് സർക്കാർ ജോലി നൽകുന്ന കാര്യം പരിഗണനയിലുണ്ടെന്ന് മുഖ്യമന്ത്രി ജഗൻ മോഹൻ റെഡ്ഡി വ്യക്തമാക്കിയിരുന്നു. ഇന്ന് ചിറ്റൂരിലെ സായി തേജയുടെ വസതി ജഗൻ മോഹൻ റെഡ്ഡി സന്ദർശിക്കുകയും ചെയ്യും. സായി തേജയുടെ സംസ്കാരം ഇന്ന് സമ്പൂർണ്ണ ബഹുമതികളോടെ നടക്കും.
ഇന്നലെ ഉച്ചയോടെ ഡൽഹിയിൽ നിന്നും പ്രത്യേക വിമാനത്തിൽ സായി തേജയുടെ മൃതദേഹം ബംഗളൂരുവിൽ എത്തിച്ചിരുന്നു. യെലഹങ്ക എയർബേസിൽ സേനാംഗങ്ങൽ അന്ത്യാഞ്ജലി അർപ്പിക്കുകയും ചെയ്തു. ഇന്ന് പുലർച്ചെ ആന്ധ്രയിലെ ചിറ്റൂരിലേക്ക് സൈനിക വിമാനത്തിൽ ഭൗതികദേഹം കൊണ്ടുവരും.
