ചെന്നൈ : തമിഴ്നാട്ടിൽ ബിആർ അംബേദ്കർ പ്രതിമയ്ക്ക് നേരെ ആക്രമണം. അജ്ഞാത സംഘം പ്രതിമ അടിച്ചു തകർത്തു. ഞായറാഴ്ച പുലർച്ചെയോടെയായിരുന്നു സംഭവം.
ഒമലൂർ ടൗണിലെ കമലപുരം കോളനിയിൽ സ്ഥാപിച്ചിരുന്ന പ്രതിമയ്ക്ക് നേരെയാണ് ആക്രമണം ഉണ്ടായത്. സംഭവത്തിൽ അംബേദ്കർ പ്രതിമയുടെ കൈ തകർന്നു. സംഭവം കണ്ട് പ്രദേശവാസികളാണ് വിവരം പോലീസിനെ അറിയിച്ചത്.
അക്രമികളെ കണ്ടെത്താൻ പോലീസ് വിശദമായ അന്വേഷണം ആരംഭിച്ചു. സംഭവ സ്ഥലത്തെത്തി പോലീസ് പ്രാഥമിക അന്വേഷണം നടത്തി. അക്രമികളെ കണ്ടെത്താൻ പ്രദേശത്തെ സിസിടിവി ദൃശ്യങ്ങൾ ഉൾപ്പെടെ പോലീസ് പരിശോധിച്ചുവരികയാണ്.
അതേസമയം സംഭവത്തിൽ പ്രതിഷേധിച്ച് പ്രദേശവാസികൾ രംഗത്ത് എത്തി. കുറ്റക്കാരെ എത്രയും വേഗം പിടികൂടണമെന്ന് ആവശ്യപ്പെട്ട് സേലം-ബംഗളൂരു ദേശീയപാതയിൽ പ്രദേശവാസികൾ കുത്തിയിരുന്ന് പ്രതിഷേധിച്ചു. ഗതാഗതം പൂർണമായി സ്തംഭിച്ചതോടെ പോലീസ് എത്തി ഇവരെ അനുനയിപ്പിക്കുകയായിരുന്നു.
