മുംബൈ: ആഡംബര വാഹന നിർമ്മാതാക്കളായ മെഴ്സിഡസ് ബെൻസ് വാഹനങ്ങളെ തിരിച്ച് വിളിക്കുന്നു. സാങ്കേതിക തകരാറിനെ തുടർന്ന് നിർമ്മാതാക്കളുടെ മുൻനിര മോഡലായ എസ്-ക്ലാസ്, ഇക്യൂഎസ് എന്നീ വാഹനങ്ങളുടെ 227 മോഡലുകളാണ് നിർമ്മാതാക്കൾ തിരിച്ച് വിളിക്കുന്നത്.
ബെൻസിന്റെ വാഹനങ്ങളിലുള്ള MBUX സംവിധാത്തിലെ തകരാറിനെ തുടർന്നാണ് തിരിച്ചുവിളിക്കൽ നടപടികൾ സ്വീകരിക്കുന്നതെന്ന് നിർമ്മാതാക്കൾ അറിയിച്ചു. ഡ്രൈവിംഗ് സമയത്ത് ഒന്നിലധികം പ്രവർത്തനങ്ങളും, ആപ്ലിക്കേഷനുകളും ഉപയോഗിക്കാൻ കഴിയുമെന്ന് കണ്ടെത്തിയെന്നും, ഇത് നിർമ്മാതാക്കളുടെ പിഴവാണെന്ന് സ്വയം തിരിച്ചറിഞ്ഞാണ് ഈ നടപടി എന്നാണ് കമ്പനി നൽകുന്ന വിശദീകരണം. നാഷണൽ ഹൈവേ ട്രാഫിക് സേഫ്റ്റി അഡ്മിനിസ്ട്രേഷന്റെ രേഖകൾ പ്രകാരം ഈ തകരാറിനെ കുറിച്ചുള്ള അന്വേഷണം നിർമ്മാതാക്കൾ കഴിഞ്ഞ മാസം തന്നെ ആരംഭിച്ചിരുന്നു.
ഒരു ഇന്റേർണൽ യൂസ്ഡ് യൂണിറ്റ് പ്രവർത്തിക്കുമ്പോൾ, MBUX ഇൻഫോടെയ്ൻമെന്റ് സിസ്റ്റത്തിന്റെ ചില പ്രവർത്തനങ്ങളും ആപ്ലിക്കേഷനുകളും ഉദ്ദേശിച്ച രീതിയിൽ പ്രവർത്തന രഹിതമാകുന്നില്ലെന്ന് നിർമ്മാതാക്കൾ കണ്ടെത്തി. ബെൻസിന്റെ ബാക്കെൻഡ് സെർവറിൽ തെറ്റായ കോൺഫിഗറേഷൻ ഉണ്ടെന്നും നിർമ്മാതാക്കളുടെ അന്വേഷണത്തിൽ കണ്ടെത്തി.
ഇൻഫോടെയ്ൻമെന്റ് സിസ്റ്റത്തിലെ തകരാർ മൂലം ഉപഭോക്താക്കൾക്ക് സുരക്ഷ പ്രശ്നങ്ങൾ ഉണ്ടാകും. വാഹനത്തിലെ ഡ്രൈവറുടെ ശ്രദ്ധ തിരിക്കാൻ ഇത്തരത്തിൽ ഇൻഫോടെയ്ൻമെന്റ് സിസ്റ്റത്തിലെ തകരാറിന് സാധിക്കും. ഡാഷ്ബോർഡിനെ കവർ ചെയ്യുന്ന MBUX ഹൈപ്പർ സ്ക്രീനാണ് മെഴ്സിഡസ് ബെൻസ് ഇക്യൂഎസ്സിനുള്ളത്. ഇത് കൂടുതൽ അപകടങ്ങൾ ക്ഷണിച്ച് വരുത്തും.
MBUX തകരാർ മൂലം, ഇത് വരെ അപകടങ്ങൾ ഒന്നും തന്നെ റിപ്പോർട്ട് ചെയ്തിട്ടില്ല. എന്നാൽ അപകട സാധ്യത മുന്നിൽ കണ്ടാണ് വാഹനങ്ങൾ തിരിച്ച് വിളിക്കുന്നതെന്നാണ് നിർമ്മാതാക്കൾ അറിയിച്ചത്. ഇത്തരത്തിലുള്ള ഹൈടെക് വാഹനങ്ങളിൽ, ഉപഭോക്താക്കളുടെ ശ്രദ്ധ തിരിക്കാൻ കഴിയുന്ന നിരവധി ഫീച്ചറുകൾ ഉണ്ട്. വലുപ്പമുള്ള സ്ക്രീനുകളോട് കൂടി എത്തുന്ന ഈ ഇൻഫോടെയ്ൻമെന്റ് സ്ക്രീനുകൾ ഏറ്റവും പുതിയ ആപ്പുകളുമായി ഘടിപ്പിച്ചിരിക്കുന്നു. വാഹനം ഓടിക്കൊണ്ടിരിക്കുമ്പോൾ, ഡ്രൈവർമാരുടെ ശ്രദ്ധ തിരിക്കാതിരിക്കാൻ, വാഹനം സഞ്ചരിക്കുമ്പോൾ തന്നെ ആവശ്യമില്ലാത്ത ആപ്പുകൾ പ്രവർത്തനരഹിതമാക്കാനാണ് കമ്പനിയുടെ നീക്കം.
സോഫ്റ്റ് വെയർ അപ്ഡേഷനിലൂടെ ഈ പ്രശ്നം പരിഹരിക്കാനാണ് കമ്പനിയുടെ ശ്രമം. അതിനാൽ വാഹന ഉടമകൾ ഇതിനായി ഡീലർഷിപ്പുകൾ സന്ദർശിക്കേണ്ടി വരില്ലെന്നും നിർമ്മാതാക്കൾ അറിയിച്ചു.
