മുംബൈ: രണ്ടാം തലമുറ അമേസിന്റെ വിൽപ്പന രണ്ട് ലക്ഷം പിന്നിട്ടതായി ഹോണ്ട കാർസ് ഇന്ത്യ അറിയിച്ചു. മെയ് 2018ലാണ് ഹോണ്ട കോംപാക്ട് സെഡാനായ അമേസിന്റെ രണ്ടാം തലമുറ മോഡൽ വിപണിയിലെത്തിച്ചത്. ഇതിനോടകം വാഹനം രണ്ട് ലക്ഷം വിൽപ്പന പൂർത്തിയാക്കി നിരത്തിൽ പുതുചരിത്രം സൃഷ്ടിച്ചതിൽ സന്തോഷവും അതിലുപരി അഭിമാനവുമുണ്ടെന്ന് നിർമ്മാതാക്കാൾ അറിയിച്ചു.
ഹോണ്ടയുടെ എക്കാലത്തെയും വിജകരമായ മോഡലുകളിൽ ഒന്നാണ് അമേസ്. 2013 ഏപ്രിലിൽ വാഹനം ആദ്യമായി അവതരിപ്പിച്ച് ഏതാനു നാളുകൾക്കുള്ളിൽ തന്നെ 4.6 ലക്ഷം വിപണി പൂർത്തിയാക്കിയിരുന്നു. ഇപ്പോഴിതാ അമേസിന്റെ രണ്ടാം തലമുറ മോഡലും വൻ വിജയമാണെന്ന് തെളിയിച്ചിരിക്കുകയാണ്. സാധാരണക്കാരനും ആഡംബരം നിറഞ്ഞ അനുഭവം പകരുന്ന വാഹനമാണ് അമേസ്. ഹോണ്ട സിറ്റിയുടെ വിജയത്തിനു ശേഷമാണ് നിർമ്മാതാക്കൾ അമേസ് അവതരിപ്പിച്ചത്.
‘കോംപാക്ട് സെഡാൻ വിഭാഗത്തിൽ ഞങ്ങളുടെ ഏറ്റവും പ്രധാനപ്പെട്ട മോഡലാണ് അമേസ്. ഇന്ത്യൻ ഉപഭോക്താക്കളെ മനസിൽ കണ്ടാണ് അമേസ് രൂപ കൽപ്പന ചെയ്തിരിക്കുന്നത്. രാജ്യത്താകമാനമുള്ള ഹോണ്ട ആരാധകരുടെ സ്വകാര്യ അഹങ്കാരമാണ് അമേസ്. ഇന്ത്യയിൽ ഇന്ന് വിപണിയിലുള്ള സെഡാനുകളിൽ എന്നും മുൻപന്തിയിലാണ് അമേസിന്റെ സ്ഥാനം’ ഹോണ്ട കാർസ് ഇന്ത്യ പ്രസിഡന്റും സിഇഒയുമായ ഗാകു നകനിഷി പറഞ്ഞു. വാഹനം ഓടിക്കുന്നവർക്ക് സ്വസ്ഥവും സുഖകരവുമായ അനുഭവം പകരുന്ന വാഹനമാണ് അമേസ് എന്നും അദ്ദേഹം കൂട്ടിച്ചേർത്തു.
ഈ സെഡാൻ മോഡലിന് പുതിയ അപ്ഹോൾസ്റ്ററി, 7-ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, ആൻഡ്രോയിഡ് ഓട്ടോ, ആപ്പിൾ കാർപ്ലേ, വോയ്സ് കമാൻഡ് ആക്ടിവേഷൻ, മൾട്ടി വ്യൂ സംവിധാനമുള്ള റിയർ പാർക്കിംഗ് ക്യാമറ, പുഷ്-ബട്ടൺ സ്റ്റാർട്ട്, ഓട്ടോമാറ്റിക് എസി തുടങ്ങിയവ നൽകിയിട്ടുണ്ട്.
രണ്ടാം തലമുറ മോഡലിൽ, അപ്ഡേറ്റുകളായ പുതിയ ഗ്രിൽ, എൽഇഡി പ്രൊജക്ടർ ഹെഡ്ലൈറ്റുകൾ, സംയോജിത എൽഇഡി ഡിആർഎൽ, എൽഇഡി ഫോഗ് ലാമ്പുകൾ, പരിഷ്കരിച്ച ബമ്പറുകൾ, 15-ഇഞ്ച് ഡയമണ്ട് കട്ട് അലോയ് വീലുകൾ, സി ആകൃതിയിലുള്ള എൽഇഡി ടെയിൽ ലൈറ്റുകൾ എന്നിവ ഈ ലഭിക്കും.
മാനുവൽ, സിവിടി ട്രാൻസ്മിഷനുമായി എത്തുന്ന 1.2 പെട്രോൾ, 1.5 ഡീസൽ എഞ്ചിനുകളാണ് അമേസിന്റെ ഹൃദയം. പെട്രോൾ വെരിയന്റിന് 6.70 ലക്ഷം മുതൽ 9.50 ലക്ഷവും, ഡീസൽ വെരിയന്റിന് 8.90 ലക്ഷം മുതൽ 12 ലക്ഷം വരെയാണ് വില(എക്സ്- ഷോറൂം വില).
