മഡ്ഗാവ്:ഐഎസ്എല്ലില്‍ കേരള ബ്ലാസ്റ്റേഴ്‌സിന് തകര്‍പ്പന്‍ വിജയം. മുംബൈ സിറ്റിയെ എതിരില്ലാതെ മൂന്നു ഗോളുകള്‍ക്കാണ് ബ്ലാസ്റ്റേഴ്സ് തകര്‍ത്തത്. ഫത്തോര്‍ഡ സ്റ്റേഡിയത്തില് ആക്രമണോത്സുക മുന്നേറ്റം നടത്തിയ ബ്ലാസ്‌റ്റേഴ്‌സിനെ നേരിടാന്‍ മുംബൈയ്‌ക്ക് ആയില്ല.
പതിനൊന്നാം മിനിറ്റില്‍ തന്നെ ബ്ലാസ്റ്റേഴ്സ് ആക്രമണം തുടങ്ങി. ആദ്യപകുതിയില്‍ സഹല്‍ അബ്ദുള്‍ സമദ് ആദ്യഗോള്‍ നേടി. തുടര്‍ന്ന് രണ്ടാംപകുതിയുടെ തുടക്കത്തില്‍ വാസ്‌ക്വിസിലൂടെ ബ്ലാസ്റ്റേഴ്‌സ അടിപതറാതെ മുന്നേറി. ജിക്‌സന്‍ സിങ് നല്‍കിയ പാസില്‍ നിന്ന് വാക്‌സ്വിന്‍ ഗോള്‍നേടി. ചരിത്രം സൃഷ്ടിച്ച ഗോളായിരുന്നു വാക്‌സിന്റെത്.
അന്‍പതാം മിനിറ്റില്‍ രണ്ടാമതും മഞ്ഞക്കാര്‍ഡ് കണ്ട മുര്‍ത്താതെഫാളിന് മാര്‍ച്ചിങ് ഓര്‍ഡര്‍ ലഭിച്ചതോടെ മുംബൈ സിറ്റിക്ക് തിരിച്ചടിയായി. ജോര്‍ജ് ഡയാസിനെ ബോക്‌സില്‍ വീഴ്‌ത്തിയതിനായിരുന്നു മഞ്ഞക്കാര്‍ഡ് ലഭിച്ചത്. പിന്നീട് നാല്‍പ്പതുമിനിറ്റിലേറെ സമയം പത്തുപേരുമായാണ് മുംബൈ മത്സരം പൂര്‍ത്തിയാക്കിയത്.
അന്‍പത്തി ഒന്നാംമിനിറ്റില്‍ പെനാല്‍റ്റി കിക്കിലൂടെ ഡയാസ് ബ്ലാസ്‌റ്റേഴ്‌സിന്റെ മൂന്നാംഗോള്‍ നേടി. ഇതോടെ പോയിന്റ് പട്ടികയില്‍ ബ്ലാസ്റ്റേഴ്സ് അഞ്ചാംസ്ഥാനത്തേക്ക് ഉയര്‍ന്നു.
