മുംബൈ: റോയൽ എൻഫീൽഡിന്റെ ഏറ്റവുമൊടുവിൽ വിപണിയിൽ എത്തിയ ക്ലാസിക് 350 ബൈക്കുകൾ തിരിച്ച് വിളിക്കുന്നു. ബ്രേക്ക് സിസ്റ്റത്തിൽ തകരാർ കണ്ടെത്തിയതിനെ തുടർന്നാണ് പരിശോധനകൾക്കായി തിരിച്ചു വിളിക്കുന്നതെന്ന് നിർമ്മാതാക്കൾ വ്യക്തമാക്കി. പുതിയ ക്ലാസിക് 350യുടെ 26,300 ബൈക്കുകളാണ് തിരിച്ചു വിളിക്കുന്നത്.
2021 സെപ്റ്റംബർ ഒന്നിനും ഡിസംബർ അഞ്ചിനുമിടയിൽ നിർമ്മിച്ച വാഹനങ്ങളാണ് തിരിച്ചു വിളിച്ചിരിക്കുന്നത്. ഈ കാലയളവിൽ നിർമ്മിച്ച ബൈക്കുകൾ, റോയൽ എൻഫീൽഡിന്റെ അംഗീകൃത സർവീസ് സെന്ററുകളിൽ എത്തിക്കണമെന്നാണ് കമ്പനി അറിയിച്ചത്. സിംഗിൾ ചാനല് എബിഎസ് മോഡലിൽ മാത്രമാണ് ഇത്തരത്തിലുള്ള പ്രശ്നം കണ്ടെത്തിയത്. അതിനാൽ സുരക്ഷ ഉറപ്പാക്കുന്നതിനുള്ള മുൻകരുതൽ എന്ന നിലയിലാണ് ഈ ബൈക്കുകൾ തിരിച്ചു വിളിച്ചിരിക്കുന്നത്.
ബൈക്കിന്റെ സ്വിങ്ങ് ആമിനോട് ചേർന്ന് നൽകിയിട്ടുള്ള ബ്രേക്ക് റിയാക്ഷൻ ബ്രാക്കറ്റിനാണ് തകരാർ സ്ഥിരീകരിച്ചത്. 2021ൽ വിപണിയിലെത്തിയ ക്ലാസിക് 350യുടെ സിംഗിൾ ചാനൽ എബിഎസ് മോഡലിന് പിന്നിലാണ് ഡ്രെം ബ്രേക്കിലാണ് ഈ സംവിധാനം നൽകിയിട്ടുള്ളത്. ഉയർന്ന് ബ്രേക്ക് ലോഡ് നൽകുമ്പോൾ ബ്രാക്കറ്റിന് കേടുപാടുകൾ സംഭവിക്കുകയും, വലിയ രീതിയിലുള്ള ശബ്ദം ഉണ്ടാക്കുകയും, ബ്രേക്ക് കുറയുകയും ചെയ്തേക്കാമെന്നാണ് നിർമ്മാതാക്കൾ കണ്ടെത്തിയത്.
1.84 ലക്ഷം മുതൽ 2.14 ലക്ഷം വരെയാണ് പുതിയ റോയൽ എൻഫീൽഡ് ക്ലാസിക് 350യുടെ എക്സ് ഷോ-റൂം വില. യുഎസ്ബി ചാർജർ, പുതുതായി രൂപകൽപ്പന ചെയ്ത ടെയിൽലൈറ്റ്, പുതുക്കിയ എക്സ്ഹോസ്റ്റ് പൈപ്പ്, 13 ലിറ്റർ ശേഷിയുള്ള ഇന്ധന ടാങ്ക്, കൂടുതൽ സുഖപ്രദമായ സവാരികൾക്കായി പ്രത്യേകം തയ്യാറാക്കിയ സീറ്റുകൾ എന്നിവയാണ് ക്ലാസിക് 350യുടെ ചില സവിശേഷതകൾ.
