ന്യൂഡല്‍ഹി: രാജ്യത്ത് ആള്‍ക്കൂട്ട കൊലപാതകങ്ങളും ആക്രമണവും പതിവായിരുന്നത് മുന്‍പ്രധാനമന്ത്രി രാജീവ് ഗാന്ധിയുടെ കാലത്ത് ആയിരുന്നുവെന്ന് അക്കമിട്ട് നിരത്തി ബിജെപി നേതാവ്. രാജ്യത്ത് നടന്ന ആള്‍ക്കൂട്ട ആക്രമണത്തിന്റെ പിതൃത്വം രാഹുലിന്റെ പിതാവും മുന്‍പ്രധാനമന്ത്രിയുമായിരുന്ന രാജീവിനാണെന്നായിരുന്നു അമിത് മാളവ്യയുടെ ട്വീറ്റ്.രാഹുല്‍ ഗാന്ധിയുടെ ട്വീറ്റിന് മറുപടിയായാണ് മാളവ്യ തിരിച്ചടിച്ചത്.
രാജ്യത്ത് ആള്‍ക്കൂട്ട ആക്രമണവും കൊലപാതകവും 2014നു മുന്‍പ് കേട്ടിരുന്നില്ലെന്ന് കഴിഞ്ഞ ദിവസം രാഹുല്‍ ട്വീറ്റ് ചെയ്തിരുന്നു. ഇതിനു മറുപടിയായാണ് ബിജെപി ഐടിസെല്‍ മേധാവി അമിത്ത്മാളവ്യ രാഹുലിന്റെ പിതാവ് രാജീവിന് ആള്‍ക്കൂട്ട അക്രമത്തിന്റെ പിതൃത്വം ആരോപിച്ച് ട്വീറ്റ് ചെയ്തത്. മോദിയുടെ വരവോടുകൂടിയാണ് ഇക്കാര്യം കേട്ടുതുടങ്ങിയതെന്നും രാഹുല്‍ട്വീറ്റ് ചെയ്തിരുന്നു. നന്ദി മോദിജി എന്ന ഹാഷ് ടാഗോടുകൂടിയാണ് ട്വീറ്റ് അവസാനിക്കുന്നത്.
രാജ്യത്തിന്റെ വിവിധ ഭാഗങ്ങളില്‍ 2014 നുമുന്‍പ് തന്നെ ഇത്തരം അക്രമങ്ങള്‍ അരങ്ങേറിയിരുന്നു. അഹ്മദാബാദ്(1969,1985), മൊറാദാബാദ്, ജല്‍ഗാവ്(1970), നെല്ലി(1983), ബിവാന്‍ഡി(1984), ഡല്‍ഹി(1984),ഭഗല്‍പൂര്‍(1989), ഹൈദരാബാദ്(1990), കാണ്‍പൂര്‍(1992), മുംബൈ(1993) തുടങ്ങിയ സ്ഥലങ്ങളെ പരാമര്‍ശിച്ചായിരുന്നു അദ്ദേഹത്തിന്റെ ട്വീറ്റ്. ഇതൊരു ചെറിയ ലിസ്റ്റാണെന്നും നൂറുകണക്കിന് ആളുകളാണ് നെഹ്‌റു-ഗാന്ധി പരിവാര്‍ മേല്‍നോട്ടത്തില്‍ കൊലചെയ്യപ്പെട്ടതെന്നും അദ്ദേഹം ട്വീറ്റ് ചെയ്തു. ഇന്ദിരാഗാന്ധിയുടെ മരണത്തിനുശേഷം രാജ്യത്ത് പൊട്ടിപ്പുറപ്പെട്ട അക്രമങ്ങളുടെ വീഡിയോ പങ്കുവച്ചുകൊണ്ടാണ് രാജീവ് ഗാന്ധിയെ പ്രതിക്കൂട്ടില്‍ നിര്‍ത്തിയത്.
രാജീവ് ഗാന്ധിയെ ആള്‍ക്കൂട്ട കൊലപാതകത്തിന്റെ പിതാവായി കാണുക. ഇന്ദിരയുടെ മരണത്തെ തുടര്‍ന്ന് രക്തം മരവിക്കുന്ന കാഴ്ചകളാണ് തെരുവില്‍ അരങ്ങേറിയത്. സിക്കുകാരെ കൂട്ടക്കൊല ചെയ്തു. സ്ത്രീകള്‍ ബലാല്‍സംഘം ചെയ്യപ്പെട്ടു. രക്തത്തിനു പകരം രക്തമെന്ന മുദ്രാവാക്യം ഉയര്‍ത്തി. കത്തുന്ന ടയറുകള്‍ കഴുത്തില്‍ ചുറ്റി സിക്കുയുവാക്കളെ കൊന്നുതളളി. അഴുക്കുചാലില്‍ വലിച്ചെറിഞ്ഞ മൃതദേഹങ്ങള്‍ നായ്‌ക്കള്‍ കടിച്ചു പറിച്ചു. മനസ്സാക്ഷി മരവിച്ച ചെയ്തികള്‍ രാജീവിന്റെതായിരുന്നു. ഇതെല്ലാം മോദിയുടെ കാലത്തായിരുന്നോയെന്നായിരുന്നു ചോദ്യം.
