ജീവന്റെ കണികകൾ തേടിയുള്ള യാത്രയിലാണ് ശാസ്ത്രജ്ഞൻമാർ. ബഹിരാകാശ പര്യവേഷണ ദൗത്യങ്ങൾ ഭൂമിയ്ക്കപ്പുറത്തുള്ള ജീവന്റെ തെളിവുകൾക്കായി അന്വേഷിച്ചുകൊണ്ടേയിരിക്കുകയാണ്. അവിടെ തടാകങ്ങളോ, സമുദ്രങ്ങളോ പോലുള്ള വലിയ ജലാശയങ്ങൾ നിലവിലുണ്ട്. അല്ലെങ്കിൽ മുൻപുണ്ടായിരുന്നു എന്നൊക്കെയാണ് പലരും വിശ്വസിക്കുന്നത്. ഇപ്പോഴിതാ ഭൂമിയെ പോലെ ജീവൻ നിലനിർത്താൻ സഹായിക്കുന്ന ചില മൂലകങ്ങൾ ശുക്രനിലെ മേഘങ്ങളിൽ ഉണ്ടെന്ന് കണ്ടെത്തിയിരിക്കുകയാണ് ഗവേഷകർ.
ശുക്രനിലെ മേഘങ്ങളിൽ അമോണിയയുടെ സാന്നിദ്ധ്യമാണ് കണ്ടെത്തിയിരിക്കുന്നത്. ഇത് അസിഡിക് അന്തരീക്ഷത്തെ വാസയോഗ്യമാക്കാൻ സഹായിക്കുമെന്നാണ് കണ്ടെത്തൽ. ഉയർന്ന അന്തരീക്ഷ താപവും സൾഫ്യൂരിക് ആസിഡ് മഴയായി പെയ്യുന്നതും ശുക്രന്റെ മാത്രം പ്രത്യേകതയാണ്. ഈ സൾഫ്യൂരിക് ആസിഡിനെ നിർവ്വീര്യമാക്കാൻ സാധിക്കുന്ന അമോണിയയെയാണ് ശുക്രനിലെ മേഘങ്ങളിൽ കണ്ടെത്തിയിരിക്കുന്നത്. ജീവന്റെ കണികകൾ തേടി പോകുന്ന ശാസ്ത്രലോകത്തിന് പ്രതീക്ഷയുണ്ടാക്കുന്നതാണ് പുതിയ കണ്ടെത്തൽ.
ശുക്രന്റെ അന്തരീക്ഷത്തിൽ പല മാറ്റങ്ങളും നടക്കുന്നുണ്ട്. ഇത് ശാസ്ത്രജ്ഞരെ ആശങ്കപ്പെടുത്തുന്നുണ്ട്. ഒരുകാലത്ത് ഒരിക്കലും മനുഷ്യവാസ യോഗ്യമാകില്ലെന്ന് എഴുതി തള്ളിയ ഗ്രഹത്തിലാണ് ഇപ്പോൾ അമോണിയയുടെ സാന്നിദ്ധ്യം കണ്ടെത്തിയിരിക്കുന്നത്. നാഷണൽ അക്കാദമി ഓഫ് സയൻസിൽ ഇതുസംബന്ധിച്ച ഒരു പഠനം അടുത്തിടെ പുറത്തിറക്കിയിരുന്നു. 1970ൽ ശുക്രനിൽ അമോണിയയുടെ ഒരു കണികമാത്രമാണ് കണ്ടെത്തിയിരുന്നത്. എന്നാലിന്ന് അത് വളരെ അധികം കൂടിയിരിക്കുന്നുവെന്ന് പഠനറിപ്പോർട്ടിൽ പറയുന്നു.
അമോണിയയുടെ അളവ് ഇതേരീതിയിൽ വർദ്ധിക്കുകയാണെങ്കിൽ മേഘങ്ങളുടെ പിഎച്ച് ലെവൽ 11ൽ നിന്ന് പൂജ്യത്തിലേക്ക് എത്തുമെന്നും ഇത് ശുക്രനിലെ ആസിഡിന്റെ അളവ് കുറയ്ക്കുമെന്നും റിപ്പോർട്ടിൽ സൂചിപ്പിക്കുന്നു. മേഘങ്ങളിൽ ആസിഡിന്റെ അളവ് കുറയുമ്പോൾ അത് ജീവൻ വളരാനുള്ള സാദ്ധ്യത കൂട്ടുന്നു. ശുക്രനിലെ ആസിഡിന്റെ അളവ് കുറയ്ക്കാനായാൽ അവിടെ ജീവന്റെ നിലനിൽപ്പ് സാദ്ധ്യമാകുമെന്നാണ് പഠനം പറയുന്നത്.
Comments