ന്യൂഡൽഹി : രാജ്യത്ത് 5 ജി നെറ്റ്വർക്ക് സ്ഥാപിക്കുന്നതിനെതിരെ ബോളിവുഡ് താരം ജൂഹി ചൗള വീണ്ടും രംഗത്ത്. സിംഗിൾ ബെഞ്ച് വിധി ചോദ്യം ചെയ്ത് അവർ ഡൽഹി ഹെെക്കോടതി ഡിവിഷൻ ബെഞ്ചിനെ സമീപിച്ചു. ഹർജി വ്യാഴാഴ്ച കോടതി പരിഗണിക്കും.
കോടതിയുടെ സമയം പാഴാക്കിയതിനും, നിയമ വ്യവസ്ഥ ദുരുപയോഗം ചെയ്തതിനും പിഴ നൽകാനും കോടതി വിധിച്ചിരുന്നു. ഇതിനെതിരെയാണ് ഇപ്പോൾ ഡിവിഷൻ ബെഞ്ചിനെ സമീപിച്ചത്.
ഈ വർഷം മെയ് 31 നാണ് 5ജി നെറ്റ്വർക്ക് സ്ഥാപിക്കുന്നതിനെതിരെ ജൂഹി ചൗള ഹൈക്കോടതി സിംഗിൾ ബെഞ്ചിനെ സമീപിച്ചത്. 5ജി നെറ്റ്വർക്ക് വരുമ്പോഴുണ്ടാകാൻ സാദ്ധ്യതയുള്ള പാരിസ്ഥിതിക, ആരോഗ്യപ്രശ്നങ്ങൾ ചൂണ്ടിക്കാട്ടിക്കൊണ്ടായിരുന്നു ഹർജി. എന്നാൽ ജൂൺ നാലിന് ഹർജി പരിഗണിച്ച സിംഗിൾ ബെഞ്ച് ഹർജി തള്ളുകയായിരുന്നു. അടിസ്ഥാനമില്ലാത്ത ഹർജിയാണെന്ന് നിരീക്ഷിച്ചുകൊണ്ടായിരുന്നു കോടതി നടപടി. അന്ന് 20 ലക്ഷം രൂപയാണ് ജൂഹി ചൗളയ്ക്ക് പിഴയായി കോടതി വിധിച്ചത്.
