അതുല്യമായ നിരവധി ജീവികൾ ഭൂമിയിലുണ്ട്. ഈ ജീവികൾക്കെല്ലാം തന്നെ അവരുടേതായ പ്രത്യേകതകളുമുണ്ട്. പലതരം വിഷ ജീവികളും അതിൽപ്പെടുന്നു. ചിലന്തിയും ജെല്ലി ഫിഷുകളും നീരാളിയും പാമ്പും തേളും വരെ. എന്നാൽ ലോകത്തിലെ ഏറ്റവും വിഷമുള്ള, വിപണിയിൽ ഈ വിഷത്തേളിന് ആവശ്യക്കാരേറെയുള്ള തേളിനെ കുറിച്ച് കേട്ടിട്ടുണ്ടോ? അത്തരത്തിലൊരു തേളിന്റെ ചിത്രവും പ്രത്യേകതകളുമാണ് ഇപ്പോൾ സമൂഹമാദ്ധ്യമങ്ങളിൽ ശ്രദ്ധനേടുന്നത്. ലോകത്തിലെ ഏറ്റവും അപകടകാരിയായ തേളുകളുടെ ഇനത്തിൽപ്പെട്ട ഡെത്ത് സ്റ്റോക്കറിൽ നിന്നാണ് ഇത്തരം വിഷം കൂടുതലും ശേഖരിക്കുന്നത്.
നീലനിറമുള്ള ഈ തേൾ ക്യൂബയിലാണ് സാധാരണയായി കാണപ്പെടുന്നത്. നിരവധി ഔഷധ ഗുണമുള്ള തേളായാണ് ഇവയെ കണക്കാക്കുന്നത്. അതിനാലാണ് ഇതിന്റെ വിഷത്തിന് ആവശ്യക്കാർ ഏറുന്നത്. തേളിന്റെ വിഷം കൊണ്ട് നിരവധി മരുന്നുകൾ നിർമ്മിക്കാൻ സാധിക്കും. ഒരു ലിറ്റർ വിഷത്തിന് 75 കോടി രൂപയാണ് വില. ഈ തേളിന്റെ വിഷത്തിൽ നിന്നാണ് ക്യാൻസറിന്റെ മരുന്നായ വിഡാറ്റോക്സ് നിർമ്മിക്കുന്നത്. ഈ മരുന്ന് ഉപയോഗിച്ചാൽ ക്യാൻസറിനെ വേരോടെ പിഴുതെറിയാം എന്നാണ് ആരോഗ്യവിദഗ്ധർ അവകാശപ്പെടുന്നത്.
തേളിന്റെ വിഷത്തിൽ 50 ലക്ഷത്തിൽ അധികം മിശ്രിതങ്ങൾ അടങ്ങിയിട്ടുണ്ടെന്ന് ആരോഗ്യവിദഗ്ധർ പറയുന്നു. അതിൽ കുറച്ച് മാത്രമെ തിരിച്ചറിഞ്ഞിട്ടുള്ളൂ. നിരവധി മാരക രോഗങ്ങൾക്കുള്ള മരുന്ന് നീലത്തേളിന്റെ വിഷത്തിൽ നിന്നും വേർതിരിക്കാൻ സാധിക്കുമെന്ന് ടെൽ അവീവ് സർവ്വകലാശാലയിലെ പ്രൊഫസർ മൈക്കൽ പറഞ്ഞു. തേൾ വിഷത്തിൽ അടങ്ങിയിരിക്കുന്ന ക്ലോറോ ടോക്സിൻ എന്ന ഘടകത്തിന് തലയേയും നട്ടെല്ലിനേയും ബാധിക്കുന്ന ചില ക്യാൻസർ സെല്ലുകളെ കണ്ടെത്താൻ സാധിക്കും. മലേറിയ ഇല്ലാതാക്കുന്നതിനും തേൾ വിഷത്തിൽ അടങ്ങിയിരിക്കുന്ന രാസവസ്തുക്കൾ ഉപയോഗിക്കും.
