ടിവിയിൽ കുക്കറി ഷോയും മറ്റ് പാചക പരിപാടികളും കാണുമ്പോൾ പലർക്കും തോന്നുന്ന കാര്യമാണ് ഒന്ന് രുചിച്ച് നോക്കാൻ പറ്റിയിരുന്നെങ്കിൽ എന്ന്. പാചകപരിപാടിക്കിടെ കാണുന്ന വിഭവങ്ങൾക്ക് പറയുന്നത്ര രുചിയുണ്ടാകുമോയെന്ന് ചിലപ്പോഴൊക്കെ നമ്മൾ സംശയിക്കാറുണ്ട്. എങ്ങനെയും അതൊന്ന് അപ്പോൾ തന്നെ രുചിക്കാൻ പറ്റിയെങ്കിലെന്ന് ആഗ്രഹിക്കാറുമുണ്ട്. പായസവും മറ്റ് മധുര പലഹാരങ്ങളും കാണുമ്പോൾ നാവിൽ വെള്ളമൂറുമെങ്കിലും എല്ലാ അനുഭവങ്ങളും കമന്റ് ബോക്സിൽ ഇടുകയാണ് നമ്മുടെ പതിവ്. എന്നാൽ ഇനി അതോർത്ത് ആരും വിഷമിക്കേണ്ട. ടിവിയിൽ കാണുന്ന വിഭവത്തിന്റെ രുചി നമുക്ക് അപ്പോൾ തന്നെ അറിയാം. അതും ടിവി സ്ക്രീനിൽ നക്കി നോക്കി.
ടേസ്റ്റ് ദ ടിവി എന്ന പേരിൽ പുറത്തിറക്കിയ സ്മാർട് ടിവിയാണ് ലോകത്തിന്റെ ഏത് കോണിലുള്ള വിഭവത്തിന്റെ രുചിയും നമുക്ക് മനസിലാക്കിത്തരുന്നത്. ജപ്പാനിലെ ടോക്യോയിൽ മെയ്ജി സർവകലാശാലയിലെ പ്രൊഫസർ ഹൊമി മിയാഷിതയാണ് വ്യത്യസ്തമായ ഈ കണ്ടുപിടിത്തതിനു പിന്നിൽ. ഒരു വർഷമെടുത്ത് സൃഷ്ടിച്ച ഈ ടിവിയുടെ ആദ്യ രൂപം ഏകദേശം ഒരു ലക്ഷം യെൻ (65,000 രൂപ) ചിലവാക്കി നിർമ്മിച്ചതാണ്.
നിങ്ങളുടെ സ്ക്രീനിൽ കാണുന്ന വിഭവങ്ങളുടെ രുചികൾ നാവിൽ തുമ്പിലെത്തിക്കുന്ന 10 ഫ്ലേവർ കാനിസ്റ്ററുകളുടെ സംയോജനമാണ് ഈ ടിടിവിയിൽ പ്രവർത്തിക്കുന്നത് . ഈ ഫ്ലേവറിന്റെ സാമ്പിൾ ടിവി സ്ക്രീനിലൂടെ കാഴ്ചക്കാരന്റെ നാവിലേയ്ക്ക് എത്തും. എന്നാൽ ഒരു നിബന്ധനയുണ്ട്. ഈ സ്ക്രീൻ വഴി പത്ത് രുചികൾ മാത്രമേ അറിയാൻ സാധിക്കൂ. ലോകത്തെ എവിടെയുളള വിഭവങ്ങളും ഇത്തരത്തിൽ അനുഭവിക്കാൻ ഈ സ്മാർട് കാലത്ത് സാധിക്കുക എന്നതാണ് താനും തനിക്കൊപ്പമുളള ഗവേഷകരും ലക്ഷ്യമിടുന്നതെന്ന് ഹൊമി മിയാഷിത പറഞ്ഞു.
എന്നാൽ ഇത് പുറത്തിറക്കിയതോടെ ലോകത്തിന്റെ പല ഭാഗങ്ങളിൽ നിന്നും ചോദ്യങ്ങളും ഉയർന്നു. തുടർന്ന് മെയ്ജി സർവ്വകലാശാലയിലെ വിദ്യാർത്ഥി തന്നെ ഇത് മാദ്ധ്യമങ്ങൾക്ക് മുന്നിൽ ഇത് പ്രദർശിപ്പിക്കുകയായിരുന്നു. ചോക്ലേറ്റ് രുചിച്ച് നോക്കണമെന്നായിരുന്നു വിദ്യാർത്ഥിയുടെ ആഗ്രഹം. ഇത് പറഞ്ഞതോടെ ടിവിയിലെ ഫ്ലേവർ ജെറ്റുകൾ വിഭവത്തിന്റെ സാമ്പിൾ ഒരു പ്ലാസ്റ്റിക് ഷീട്ടിലേക്ക് സ്പ്രേ ചെയ്തു. ടിവിയിൽ നിന്ന് വന്നത് മിൽക്ക് ചോക്ലേറ്റ് ആണെന്നാണ് വിദ്യാർത്ഥി പറഞ്ഞത്. കുക്കറി ഷോകൾക്കും സ്വാദ് നോക്കുന്ന കളികൾക്കും ഈ ടിവി ഉപയോഗിക്കാനാകുമെന്ന് ഗവേഷകർ പ്രതീക്ഷിക്കുന്നു.
എന്നാൽ ഇതോടെ കണ്ടുപിടിത്തങ്ങൾ അവസാനിപ്പിക്കാനും ഉദ്ദേശിച്ചിട്ടില്ല മിയാഷിത. പാട്ട് ഡൗൺലോഡ് ചെയ്ത് ആസ്വദിക്കുന്നത് പോലെ ടിവിയിൽ നിന്നും ഭക്ഷണം ഡൗൺലോഡ് ചെയ്യാനുള്ള സംവിധാനം ഒരുക്കണമെന്നാണ് ഗവേഷക പറയുന്നത്. എന്തായാലും ഇനി അമേരിക്കയിലേയും തായ്ലാന്റിലേയും വിഭവങ്ങൾ കഴിക്കാൻ ആഗ്രഹിക്കുന്ന ഭക്ഷണ പ്രേമികൾക്ക് അവിടേക്ക് പോകേണ്ട ആവശ്യമില്ല. സ്വീകരണ മുറിയിൽ ഇങ്ങനെ ഒരു ടിടിടിവി വാങ്ങി വെച്ചാൽ മതിയാകും. കാലം പോയ പോക്കേ എന്നല്ലാതെ എന്ത് പറയാൻ….
Comments