തിരുവനന്തപുരം: മേയർ ആര്യാ രാജേന്ദ്രനെ പരിഹസിച്ച കോൺഗ്രസ് എംപി കെ മുരളീധരന് മറുപടിയുമായി മന്ത്രി വി ശിവൻകുട്ടി. ശക്തനായി വന്ന് നേമത്ത് ശക്തമായി തന്നെ തോറ്റതിന്റെ വിഷമമാണ് മുരളീധരനെന്ന് ശിവൻകുട്ടി പരിഹസിച്ചു. മേയർ ആര്യാ രാജേന്ദ്രന് അംഗീകാരം ലഭിക്കുന്നതിന്റെ അസൂയയാണ് മുരളീധരനെന്നും ശിവൻകുട്ടി പറഞ്ഞു.
തിരുവനന്തപുരം മേയർ ആര്യാ രാജേന്ദ്രനെ പരിഹസിച്ച് കഴിഞ്ഞ ദിവസമാണ് കെ മുരളീധരൻ രംഗത്തെത്തിയത്. തിരുവനന്തപുരം മേയർക്ക് തീരെ വിവരമില്ലെന്നായിരുന്നു മുരളീധരന്റെ പരാമർശം. തലസ്ഥാനത്ത് രാഷ്ട്രപതി രാംനാഥ് കോവിന്ദ് എത്തിയപ്പോൾ, അദ്ദേഹത്തിന്റെ വാഹനവ്യൂഹത്തിലേയ്ക്ക് മേയറുടെ കാർ കയറിപ്പോയെന്ന വിഷയം ഉന്നയിച്ചാണ് മുരളീധരൻ അതിരൂക്ഷവിമർശനം നടത്തിയത്.
മേയർക്ക് സൗന്ദര്യമുണ്ടെങ്കിലും വായിൽ നിന്ന് വരുന്നത് ഭരണിപ്പാട്ടാണെന്നായിരുന്നു മുരളീധരന്റെ പരിഹാസം. ഇങ്ങനെയാണ് പോകുന്നതെങ്കിൽ മേയറെ നോക്കി ‘കനകസിംഹാസത്തിൽ’ എന്ന പാട്ട് പാടേണ്ടി വരുമെന്നും മുരളീധരൻ പരിഹസിച്ചിരുന്നു.
