ജോഹന്നാസ് ബെർഗ്: ദക്ഷിണാഫ്രിക്കയും ഇന്ത്യയും തമ്മിലുള്ള രണ്ടാം ടെസ്റ്റിന്റെ ഒന്നാം ഇന്നിങ്സിൽ ദക്ഷിണാഫ്രിക്കയുടെ ഏഴ് വിക്കറ്റുകൾ വീഴ്ത്തി ഇന്ത്യയുടെ മീഡിയം പേസർ ഷാർദുൽ ഠാക്കൂർ.ദക്ഷിണാഫ്രിക്കയ്ക്കയെ പന്തെറിഞ്ഞ് വീഴ്ത്തിയ താരം മത്സരത്തിലെ പ്രകടനത്തിലൂടെ ദക്ഷിണാഫ്രിക്കയ്ക്കെതിരെ ഒരു ഇന്ത്യൻ ബൗളറുടെ ഏറ്റവും മികച്ച ബൗളിംഗ് പ്രകടനമെന്ന റെക്കോർഡ് സ്വന്തമാക്കി.
വാണ്ടറേഴ്സ് ടെസ്റ്റിൽ ദക്ഷിണാഫ്രിക്കയ്ക്കെതിരെ ഒന്നാം ഇന്നിങ്സിൽ 17.5 ഓവറിൽ 61 റൺസ് വഴങ്ങി ഏഴ് വിക്കറ്റുകൾ വീഴ്ത്തിയ ഷാർദുൽ 2015-2016ൽ ദക്ഷിണാഫ്രിക്കയ്ക്കെതിരെ നാഗ്പൂരിൽ നടന്ന ടെസ്റ്റിൽ 66 റൺസ് വഴങ്ങി ഏഴ് വിക്കറ്റെടുത്ത ആർ അശ്വിന്റെ റെക്കോർഡാണ് മറികടന്നത്.
ദക്ഷിണാഫ്രിക്കയിൽ ഒരു ഇന്ത്യൻ ബൗളറുടെ ഏറ്റവും മികച്ച ബൗളിംഗ് പ്രകടനം എന്ന റെക്കോർഡ് കൂടി താരം സ്വന്തം പേരിലാക്കി. 1992-93ൽ ജോഹന്നാസ് ബെർഗിൽ അനിൽ കുംബ്ലെ(53-6), 2001-2002ൽ പോർട്ട് എലിസബത്തിൽ ജവഗൽ ശ്രീനാഥ്(76-6), 2013-2014 ഡർബനിൽ രവീന്ദ്ര ജഡേജ(138-6) എന്നിവയാണ് ദക്ഷിണാഫ്രിക്കൻ മണ്ണിൽ ഇന്ത്യൻ ബൗളർമാരുടെ മികച്ച ബൗളിംഗ് പ്രകടനങ്ങൾ.
വാണ്ടറേഴ്സിൽ ഒരു ബൗളറുടെ ഏറ്റവും മികച്ച ബൗളിംഗ് പ്രകടനത്തിന് ഇംഗ്ലീഷ് താരം മാത്യു ഹൊഗാർഡിന്റെ പേരിലുണ്ടായിരുന്ന റെക്കോർഡിന് ഒപ്പമെത്താനും ഇന്നത്തെ പ്രകടനത്തോടെ ഷാർദുലിനായി. 2004-2005ൽ ഹൊഗാർഡ് 61 റൺസ് വഴങ്ങക്കൊണ്ടായിരുന്നു ഏഴ് വിക്കറ്റെടുത്തത്.
Comments