കൊച്ചി: ഉണ്ണി മുകുന്ദൻ ചിത്രമായ മേപ്പടിയാന്റെ പ്രമോഷനുമായി ബന്ധപ്പെട്ട് വേറിട്ട സമ്മാന പദ്ധതിയുമായി അണിയറക്കാർ. സിനിമ തിയറ്ററിലെത്തി കാണുന്ന 111 പേർക്ക് ഡയമണ്ട് റിങ്ങുകൾ സമ്മാനമായി നൽകും.
സിനിമയുടെ റിലീസുമായി ബന്ധപ്പെട്ട് മേപ്പടിയാൻ -ചുങ്കത്ത് മത്സരത്തിൽ പങ്കെടുക്കുന്നവർക്കാണ് ഈ ഭാഗ്യം ലഭിക്കുന്നത്. ചിത്രം റിലീസ് ചെയ്യുന്ന തിയറ്ററുകളിൽ ഒരുക്കിയിട്ടുളള മേപ്പടിയാൻ- ചുങ്കത്ത് സെൽഫി കൗണ്ടറിൽ നിന്ന് സെൽഫി എടുക്കണം. പിന്നീട് ഈ സെൽഫിയോടൊപ്പം മേപ്പടിയാനെകുറിച്ചുള്ള നാലുവരിയിൽ കൂടാത്ത റിവ്യൂ മേപ്പടിയാൻ ചുങ്കത്ത് ഡയമണ്ട് കോണ്ടസ്റ്റ് എന്ന ഹാഷ് ടാഗിനൊപ്പം ഫേസ്ബുക്കിലും ഇൻസ്റ്റഗ്രാമിലും പങ്കു വയ്ക്കണം.
ഇതിൽ നിന്ന് തെരഞ്ഞെടുക്കപ്പെടുന്ന 111 പേർക്കാണ് ഡയമണ്ട് റിംഗ് ലഭിക്കുക. ഒരു തിയേറ്ററിൽ നിന്നും ഒരു ഭാഗ്യശാലിക്കായിരിക്കും സമ്മാനം ലഭിക്കുക. 14 നാണ് തീയേറ്ററുകളിൽ മേപ്പടിയാൻ റിലീസ് ചെയ്യുന്നത്. ഓൺലൈൻ ബുക്കിംഗ് കഴിഞ്ഞ ദിവസം ആരംഭിച്ചിരുന്നു.
വിഷ്ണു മോഹൻ സംവിധാനം ചെയ്യുന്ന മേപ്പടിയാന്റെ നിർമാണം ഉണ്ണി മുകുന്ദൻ ഫിലിംസിന്റെ ബാനറിൽ ഉണ്ണി മുകുന്ദൻ തന്നെയാണ് നിർവ്വഹിച്ചിരിക്കുന്നത്. ഗുഡ് വിൽ എന്റർടെയ്ൻമെന്റ്സാണ് വിതരണം.
മൂന്ന് വർഷത്തെ ഇടവേളയ്ക്ക് ശേഷമാണ് ഉണ്ണി മുകുന്ദൻ നായകനാകുന്ന ചിത്രം തിയറ്ററിലെത്തുന്നത്.
