ഒറ്റത്തവണ ചാർജ് ചെയ്താൽ 500 കിലോമീറ്റർ വരെ സഞ്ചരിക്കാൻ ശേഷിയുള്ള ഇലക്ട്രിക് വാഹനം അവതരിപ്പിക്കാൻ ഒരുങ്ങുകയാണ് എംജി മോട്ടോഴ്സ്. ഇപ്പോൾ വിപണിയലുള്ള എംജി ഇസഡ് എസ് ഇവിയുടെ ഫെയ്സ് ലിഫ്റ്റ് പതിപ്പാണ് റേഞ്ചിൽ വിപ്ലവം സൃഷ്ടിക്കാൻ തയ്യാറാകുന്നത്. വാഹനം ഈ വർഷം തന്നെ അവതരിപ്പിച്ചേക്കുമെന്നാണ് സൂചന. വിലയുടെ പ്രഖ്യാപനം അടുത്ത മാസം തന്നെയുണ്ടായേക്കാം.
ബാറ്ററിയിൽ മാറ്റം വരുത്തിയാണ് ഇസഡ് എസ് പുതിയ പതിപ്പ് എത്തുന്നത്. 51 kWh ബാറ്ററിയാണ് വാഹനത്തിന് നൽകിയിട്ടുള്ളത്. ഇത് 480 കിലോമീറ്റർ വരെ റേഞ്ച് നൽകുന്നു എന്നാണ് നിർമ്മാതാക്കൾ പറയുന്നത്. നിലവിൽ ഇസഡ് എസ് ഇവിക്കുള്ളത് 419 കിലോമീറ്റർ റേഞ്ച് നൽകുന്ന 44.5 kWh ബാറ്ററിയാണ്.
2022 ഇസ്ഡ്.എസ് ഇ.വി ഫെയ്സ്ലിഫ്റ്റ് കഴിഞ്ഞ ഒക്ടോബറിൽ ആഗോളതലത്തിൽ എംജി അവതരിപ്പിച്ചിരുന്നു. എംജി ആസ്റ്ററുമായി കൂടുതൽ സാമ്യമുള്ള രൂപമാണ് വാഹനത്തിന്. എൽഇഡി ഡേടൈം റണ്ണിങ് ലൈറ്റുകളുള്ള (ഡിആർഎൽ) മെലിഞ്ഞ ഹെഡ്ലാമ്പുകളും എൽഇഡി ടെയിൽ ലാമ്പുകളും ആസ്റ്ററിലേതിന് സമാനമാണ്.
മുന്നിലും പിന്നിലും ബമ്പറുകൾ ഈ പതിപ്പിന് പുതുമയുള്ളതാണ്. അതിശയിപ്പിക്കുന്ന സ്പോർട്ടി വിശദാംശങ്ങളും വാഹനത്തിന് നൽകിയിട്ടുണ്ട്. ഏറ്റവും ശ്രദ്ധേയമായ വ്യത്യാസം, പരമ്പരാഗത ഗ്രില്ലിന് പകരം വരുന്ന ബോഡി-കളർ, ബ്ലാങ്ക്ഡ്-ഓഫ് ഫ്രന്റൽ സെക്ഷനാണ്. ചാർജിങ് പോർട്ട് ഇപ്പോഴും എംജി ബാഡ്ജിന് അടുത്താണ്.
മുൻതലമുറ മോഡലിലെ പോലെ, ഡിജിറ്റൽ ഇൻസ്ട്രുമെന്റ് ക്ലസ്റ്റർ, 10.1 ഇഞ്ച് ടച്ച്സ്ക്രീൻ എന്നിവ ഫെയ്സ് ലിഫ്റ്റിൽ ഉൾപ്പെടുത്തിയേക്കും. ഡാഷ്ബോർഡിൽ ഘടിപ്പിച്ച എ.ഐ അസിസ്റ്റന്റും പെട്രോളിൽ പ്രവർത്തിക്കുന്ന ആസ്റ്ററിൽ നിന്നുള്ള ലെവൽ 2 ഓട്ടോണമസ് എഡിഎഎസ് ഫീച്ചറുകളും ഇസഡ് എസ് ഇവി ഫെയ്സ് ലിഫ്റ്റിൽ ഉൾപ്പെടുത്തിയേക്കും എന്നാണ് റിപ്പോർട്ടുകൾ.
Comments