കൊച്ചി : സംസ്ഥാനത്തെ കോടതികൾ തിങ്കളാഴ്ച മുതൽ ഓൺലൈൻ ആയി പ്രവർത്തിക്കും. കൊറോണ വ്യാപനം രൂക്ഷമായ സാഹചര്യത്തിലാണ് കോടതി നടപടികൾ ഓൺലൈൻ ആക്കുന്നത്. ഇക്കാര്യം വ്യക്തമാക്കി ഹൈക്കോടതി സർക്കുലർ പുറത്തിറക്കി.
ഹൈക്കോടതിയിലും കീഴ്ക്കോടതികളിലും ഓൺലൈനായി ആയിരിക്കും കേസുകൾ പരിഗണിക്കുക. തീർത്തും ഒഴിവാക്കാനാകാത്ത കേസുകൾ മാത്രം കോടതി നേരിട്ട് വാദം കേൾക്കും. ഇത്തരം സാഹചര്യങ്ങളിൽ 15 പേർക്ക് മാത്രമാകും കോടതിമുറിയിൽ പ്രവേശിക്കാൻ അനുമതിയുണ്ടാകുക. ഇതിനെല്ലാം പുറമേ കോടതികളിൽ പൊതുജനത്തിനും പ്രവേശന നിയന്ത്രണം ഏർപ്പെടുത്തിയിട്ടുണ്ട്.
നിലവിൽ സംസ്ഥാനത്തെ പ്രതിദിന കൊറോണ കേസുകൾ 20,000 ലേക്ക് അടുക്കുകയാണ്. ഇന്ന് 17,755 പേർക്കാണ് കൊറോണ സ്ഥിരീകരിച്ചത്. എറണാകുളം ജില്ലയിലാണ് ഏറ്റവും കൂടുതൽ കൊറോണ പ്രതിദിന കേസുകൾ റിപ്പോർട്ട് ചെയ്തത്. 89 മരണങ്ങളും സ്ഥിരീകരിച്ചു.
