ലക്നൗ : ഛത്തീസ്ഗഡ് മുഖ്യമന്ത്രി ഭൂപേഷ് ബാഗലിനെതിരെ കേസ് എടുത്ത് യുപി പോലീസ്. തെരഞ്ഞെടുപ്പ് കമ്മീഷൻ നിർദ്ദേശിച്ച കൊറോണ സുരക്ഷാ മാനദണ്ഡങ്ങൾ ലംഘിച്ചതിനാണ് കേസ് എടുത്തത്. ജില്ലാ തെരഞ്ഞെടുപ്പ് ഓഫീസറുടെ പരാതിയിലാണ് നടപടി.
തെരഞ്ഞെടുപ്പിന്റെ ഭാഗമായുള്ള കോൺഗ്രസിന്റെ പ്രചാരണ പരിപാടികൾക്കായി ഭൂപേഷ് ബാഗൽ യുപിയിൽ എത്തിയിരുന്നു. പ്രചാരണ പരിപാടികളിലും മറ്റും അഞ്ച് പേരിൽ കൂടുതൽ പങ്കെടുക്കരുത് എന്നാണ് തെരഞ്ഞെടുപ്പ് കമ്മീഷൻ നിർദ്ദേശിച്ചിരുന്നത്. എന്നാൽ നിരവധി കോൺഗ്രസ് നേതാക്കളാണ് അദ്ദേഹത്തിനൊപ്പം പ്രചാരണത്തിനായി ഉണ്ടായിരുന്നത്. നിരവധി ആളുകളുമായി ഭൂപേഷ് ബാഗൽ അടുത്തിടപഴകുകയും ചെയ്തു. ഇതേ തുടർന്നാണ് തെരഞ്ഞെടുപ്പ് ഓഫീസർ പരാതി നൽകിയത്. ഭൂപേഷ് ബാഗലിന് പുറമേ സുരക്ഷാ മാനദണ്ഡങ്ങൾ ലംഘിച്ച മറ്റ് പ്രവർത്തകർക്കെതിരെയും കേസ് എടുത്തിട്ടുണ്ട്.
ഭൂപേഷ് ബാഗലിനും കോൺഗ്രസ് നേതാക്കൾക്കുമെതിരെ പകർച്ചവ്യാധി നിയമപ്രകാരമാണ് കേസ് എടുത്തത്.
