അങ്കത്തട്ടുണർന്നു; സ്ഥാനാർത്ഥി പ്രഖ്യാപനങ്ങൾ പുരോഗമിക്കുന്നു; തെരഞ്ഞെടുപ്പ് ചൂടിൽ ഉത്തർപ്രദേശ്, റായ്ബറേലിയിൽ മുൻ കോൺഗ്രസ് എംഎൽഎ മത്സരിക്കും

ലക്‌നൗ: ഉത്തർപ്രദേശിൽ നിയമസഭാ തെരഞ്ഞെടുപ്പിലേക്കുള്ള അവസാന ഘട്ട ഒരുക്കത്തിലാണ് ഭരണകക്ഷിയായ ബിജെപി അടക്കമുള്ളവർ. തെരഞ്ഞെടുപ്പിലേക്കുള്ള മൂന്നാഘട്ട സ്ഥാനാർത്ഥി പട്ടികയും ബിജെപി പുറത്തിറക്കി. 15 സ്ത്രീകൾ ഉൾപ്പെടെ 85 പേരടങ്ങുന്ന പട്ടികയാണ് പുറത്തിറക്കിയിരിക്കുന്നത്. നേരത്തെ ഒന്നും രണ്ടും ഘട്ട തെരഞ്ഞെടുപ്പിലേക്കുള്ള സ്ഥാനാർത്ഥികളുടെ പട്ടിക ബിജെപി പുറത്തിറക്കിയിരുന്നു.

കോൺഗ്രസ് മുൻ എംഎൽഎ ആയിരുന്ന അതിഥി സിങ്ങും മൂന്നാം ഘട്ട സ്ഥാനാർത്ഥികളുടെ പട്ടികയിലുണ്ട്. റായ്ബറേലിയിൽ നിന്നാണ് അതിഥി സിംഗ് ജനവിധി തേടുക. ഗാന്ധി കുടുംബത്തിലെ വിശ്വസ്തയായിരുന്നു അതിഥി. കഴിഞ്ഞ കുറേ നാളുകളായി കോൺഗ്രസുമായി ഇടഞ്ഞു നിൽക്കുന്ന അതിഥി തെരഞ്ഞെടുപ്പ് പ്രഖ്യാപനത്തിന് പിന്നാലെ ബിജെപിയിൽ ചേരുകയായിരുന്നു.

മുൻ ഐപിഎസ് ഉദ്യോഗസ്ഥൻ അസിം അരുൺ കാനൗജിൽ നിന്ന് മത്സരിക്കും. ഈ അടുത്താണ് അദ്ദേഹം പാർട്ടി അംഗത്വം നേടിയത്. മുൻ സമാജ്‌വാദി പാർട്ടി എംഎൽഎ നിതിൻ അഗർവാൾ ഹർദോയിയിൽ മത്സരിക്കും, മുൻ ബിഎസ്പി നേതാവ് രാംവീർ ഉപാധ്യായ് സദാബാദിൽ നിന്നും, സതീഷ് മഹാന മഹാരാജപുരിൽ നിന്നും മത്സരിക്കും. ഫെബ്രുവരി 20നാണ് യുപിയിൽ മൂന്നാം ഘട്ട തെരഞ്ഞെടുപ്പ് നടക്കുന്നത്.

BJP releases its second list of candidates for the upcoming #UttarPradeshElections

Aditi Singh, who recently quit Congress to join BJP, to contest from Rae Bareli (1/2) pic.twitter.com/xQE51vy6v2

— ANI UP/Uttarakhand (@ANINewsUP) January 21, 2022

നേരത്തെ ഒന്നും രണ്ടും ഘട്ടത്തിലേക്കുള്ള 105 പേരുടെ സ്ഥാനാർത്ഥി പട്ടികയാണ് ബിജെപി പുറത്തുവിട്ടത്. മുഖ്യമന്ത്രി യോഗി ആദിത്യനാഥ് ഗോരഖ്പൂർ അർബൻ മണ്ഡലത്തിൽ നിന്നുമാണ് ജനവിധി തേടുന്നത്. ഉപമുഖ്യമന്ത്രി കേശവ് പ്രസാദ് മൗര്യ സിറാത്തൂരിൽ നിന്നും നോയിഡയിൽ പ്രതിരോധ മന്ത്രി രാജ്നാഥ് സിംഗിന്റെ മകൻ പങ്കജ് സിംഗും മത്സരിക്കും. ഫെബ്രുവരി പത്തിനാണ് ഉത്തർപ്രദേശിൽ നിയമസഭാ തെരഞ്ഞെടുപ്പ് തുടങ്ങുന്നത്.