പഞ്ചിന് വില വർദ്ധിപ്പിച്ച് ടാറ്റ; ഈ വെരിയന്റുകൾക്ക് ഇനിമുതൽ പുതിയ വില

മുംബൈ: കുഞ്ഞനും കരുത്തനുമായ സബ്-കോംപാക്ട് എസ് യുവി പഞ്ചിന്റെ വില വർദ്ധിപ്പിച്ച് ടാറ്റ. 2021 ഒക്ടോബർ മുതലാണ് പഞ്ചിന്റെ വിൽപ്പന ആരംഭിച്ചത്. നിരത്തിലെത്തി മൂന്ന് മാസം പിന്നിടുമ്പോൾ, 15,000 രൂപയുടെ വില വർദ്ധനവാണ് പഞ്ചിനുണ്ടായത്. ബേസ് വെരിയന്റുകൾക്കാണ് കൂടുതലായും വില വർദ്ധിച്ചത്.

പ്യുവർ, പ്യുവർ റിഥം എന്നീ രണ്ട് ബേസ് വെരിയന്റുകൾക്കാണ് 15,000 രൂപയുടെ വില വർദ്ധനവുണ്ടായത്. മറ്റ് വെരിയന്റുകൾക്ക് 10,000 ആണ് വർദ്ധിപ്പിച്ചത്. വാഹനത്തിന്റെ നിർമ്മാണ ചെലവ് വർദ്ധിച്ചതാണ് ഒറ്റയടിക്ക് പഞ്ചിന് വിലകൂടാൻ കാരണമെന്നാണ് നിർമ്മാതാക്കൾ വിശദീകരിക്കുന്നത്. എന്നാൽ, ഉപഭോക്താക്കൾക്ക് മറ്റൊരു ആശ്വാസവും ടാറ്റ പ്രഖ്യാപിച്ചിട്ടുണ്ട്. ജനുവരി 18ന് മുൻപ് വാഹനം ബുക്ക് ചെയ്തവരെ വില വർദ്ധനവ് ബാധിക്കില്ല എന്നാണ് ടാറ്റ അറിയിച്ചത്. ഇതിന് പുറമെ, പഞ്ചിന്റെ ടോപ്പ് വെരിയന്റുകളായ ക്രിയേറ്റീവ്, ക്രിയേറ്റീവ് ഇറ എന്നിവയുടെ വില കുറച്ചിട്ടുണ്ട്. ഏകദേശം 10,000 രൂപയാണ് ഈ രണ്ട് വെരിയന്റുകൾക്കും കുറച്ചത്.

നിലവിൽ പ്യുവർ വെരിയന്റിന് 5.49 ലക്ഷം രൂപയാണ് വില. എന്നാൽ വില വർദ്ധനവ് പ്രഖ്യാപിച്ചതിന് ശേഷം 5.64 ലക്ഷം രൂപയായിരിക്കും പഞ്ചിന്റെ വില. അതേസമയം, ക്രിയേറ്റീവ് വെരിയന്റിന്റെ വില 8.48 ലക്ഷം രൂപയിൽ നിന്നും 8.38 ലക്ഷമായി കുറഞ്ഞു. മറ്റ് വെരിയന്റുകൾക്ക് ഏകദേശം 10,000 രൂപയുടെ വ്യത്യാസം മാത്രമാണുള്ളത്.

ടാറ്റ വിപണയിലിറക്കിയ മറ്റൊരു പ്രതിഭാസമാണ് പഞ്ച്. വിപണിയിലെത്തി ദിവസങ്ങൾക്കകം തന്നെ വൻ ജനപ്രീതിയാണ് പഞ്ച് നേടിയത്. വലിയ രീതിയിലുള്ള ബുക്കിംഗ് ലഭിച്ചതിനെ തുടർന്ന് അനേകം ഉപഭോക്താക്കൾക്ക് പഞ്ച് സ്വന്തമാക്കാൻ ഏറെ നാൾ കാത്തിരിക്കേണ്ടി വന്നിട്ടുണ്ട്. പ്രവർത്തനത്തിന്റെ കാര്യത്തിലും, സുരക്ഷയുടെ കാര്യത്തിലും മുൻപന്തിയിലാണ് പഞ്ച്.

ഇംപാക്ട് 2.0 ഡിസൈൻ ലാംഗ്വേജിൽ ടാറ്റയുടെ ആൽഫ-ആർക്ക് അടിസ്ഥാനമാക്കി നിർമ്മിച്ച ആദ്യ സബ്- കോംപാക്ട് എസ് യുവിയാണ് പഞ്ച്. ടാറ്റാ ആൾട്രോസിന്റെ അതേ പ്ലാറ്റ്‌ഫോമിലാണ് പഞ്ചിന്റെ നിർമ്മാണവും പൂർത്തിയാക്കിയിരിക്കുന്നത്. 16-ഇഞ്ച് ടയറുകൾ, 187 മില്ലിമീറ്റർ ഗ്രൗണ്ട് ക്ലിയറൻസ്, 90-ഡിഗ്രി തുറക്കാൻ സാധിക്കുന്ന ഡോറുകൾ, ഡ്യുവൽ എയർ ബാഗുകൾ എന്നിവയും പഞ്ചിന്റെ മാറ്റ്കൂട്ടുന്നു. 2-ലിറ്റർ 3-സിലിണ്ടർ എൻജിനാണ് പഞ്ചിന്റെ ഹൃദയം. അടുത്തുതന്നെ ടർബോ-പെട്രോൾ എൻജിനിൽ പഞ്ച് അവതരിപ്പിക്കാനാണ് ടാറ്റ പദ്ധതിയിടുന്നത്. നിരത്തിൽ മാരുതി ഇഗ്നിസ്, മഹീന്ദ്ര കെയുവി100, റെനോ കിഗർ, നിസ്സാൻ മാഗ്‌നൈറ്റ് എന്നിവയാണ് പഞ്ചിന്റെ പ്രധാന എതിരാളികൾ.