ലണ്ടൻ : ഡയാന രാജകുമാരി ഇസ്ലാം മതം സ്വീകരിക്കാൻ ആലോചിച്ചിരുന്നുവെന്ന വെളിപ്പെടുത്തലുമായി മുൻ റോയൽ ഫോട്ടോഗ്രാഫർ അൻവർ ഹുസൈൻ . ഒരു വിമാനയാത്രയ്ക്കിടെ രാജകുമാരി തന്നോട് ഇക്കാര്യങ്ങൾ പറഞ്ഞതായാണ് ഹുസൈൻ മാദ്ധ്യമങ്ങൾക്ക് നൽകിയ അഭിമുഖത്തിൽ പറയുന്നത്.
1990-കളിൽ ഡയാന ഹൃദയ ശസ്ത്രക്രിയാ വിദഗ്ധനായ ഹസ്നത്ത് ഖാനുമായി പ്രണയത്തിലായിരുന്നു . ഹസ്നത്ത് ഖാനെ വിവാഹം കഴിക്കാനാണ് ഇസ്ലാം മതം സ്വീകരിക്കാൻ ഡയാന ആലോചിച്ചിരുന്നത് . മതം മാറിയ ശേഷം വിവാഹം കഴിക്കാനും ആലോചനയുണ്ടായിരുന്നു.
“ഞാൻ ഒരു ഇംഗ്ലീഷ് പെൺകുട്ടിയായ കരോളിനെയാണ് വിവാഹം കഴിച്ചതെന്ന് ഡയാനയ്ക്ക് അറിയാമായിരുന്നു. അവർക്ക് ഇസ്ലാമിനെ കുറിച്ച് അറിയാൻ ആഗ്രഹമുണ്ടായിരുന്നു. ഒരാൾ മുസ്ലീമും മറ്റൊരാൾ ക്രിസ്ത്യനും ആയിരിക്കുമ്പോൾ വിവാഹം കഴിക്കുന്നതിനെക്കുറിച്ചും അവർ ചോദിച്ചു.- അൻവർ ഹുസൈൻ പറഞ്ഞു.
ഡോ. ഹസ്നത്ത് ഖാനെ പറ്റി ഡയാന പരാമർശിച്ചില്ല, പക്ഷേ എനിക്കത് അറിയാമെന്ന് അവർ ഊഹിച്ചു. കുടുംബം ഹസ്നത്ത് ഖാനോടും അതുപോലുള്ള കാര്യങ്ങളോടും എങ്ങനെ പ്രതികരിക്കുമെന്ന് ഡയാനയ്ക്ക് ആശങ്കയുമുണ്ടായിരുന്നുവെന്ന് ഹുസൈൻ പറഞ്ഞു .
അന്ന് ഡയാന വളരെ “ഭ്രാന്തമായി പ്രണയത്തിലായിരുന്നു” എന്ന് ഒരു അടുത്ത സുഹൃത്ത് പറഞ്ഞിരുന്നു , ഹസ്നത്ത് ഖാനൊപ്പം കഴിയാൻ പാകിസ്താനിലേക്ക് മാറുന്നതിനെക്കുറിച്ചും അവർ ചിന്തിച്ചു . എന്നാൽ ഇതിനിടെ അവരുടെ ബന്ധം തകർന്നതോടെ ആ ആശയങ്ങൾ ഉപേക്ഷിച്ചു.
“ഞാൻ അവരെ വിവാഹം കഴിച്ചാൽ, ഞങ്ങളുടെ വിവാഹം ഒരു വർഷത്തിൽ കൂടുതൽ നീണ്ടുനിൽക്കില്ല. സാംസ്കാരികമായി പരസ്പരം വളരെ വ്യത്യസ്തരാണ്.“ എന്നായിരുന്നു പിന്നീട് ഹസ്നത്ത് ഖാന്റെ പ്രതികരണം.
