താര ദമ്പതികളായ അനുഷ്ക ശർമ്മയുടെയും വിരാട് കോഹ്ലിയുടെയും മകളാണ് വാമിക. 2021 ജനുവരിയിലാണ് വാമിക ജനിച്ചത്. അന്ന് മുതൽ ഇന്ന് വരെ വാമികയുടെ സ്വകാര്യത കാത്തുസൂക്ഷിക്കാൻ കോഹ്ലിയും അനുഷ്കയും ശ്രദ്ധിച്ചിരുന്നു. കഴിഞ്ഞയിടെ വാമികയുടെ ഒന്നാം പിറന്നാൾ ആഘോഷിച്ചപ്പോഴും സ്വകാര്യത മാനിച്ച് കുഞ്ഞിന്റെ ഒരു ചിത്രം പോലും ഇരുവരും സമൂഹമാദ്ധ്യമങ്ങളിൽ പങ്കുവെച്ചിരുന്നില്ല. വാമികയുമൊത്ത് പുറത്ത് പോകുന്ന വേളകളിലും കുഞ്ഞിന്റെ മുഖം ക്യാമറയിലും മറ്റും പകർത്തരുതെന്ന് മാദ്ധ്യമങ്ങളോടുൾപ്പെടെ കോഹ്ലിയും അനുഷ്കയും അഭ്യർത്ഥിച്ചിരുന്നു. എന്നാൽ ഇന്ന് വാമികയുടെ മുഖം ആദ്യമായി ക്യാമറയ്ക്ക് മുന്നിൽ ചിത്രീകരിച്ചിരിക്കുകയാണ്.
ഇന്ത്യ-ദക്ഷിണാഫ്രിക്ക ഏകദിനം കാണാൻ കേപ് ടൗണിൽ എത്തിയതായിരുന്നു അനുഷ്കയും കുഞ്ഞും. ഈ സമയത്താണ് ക്രിക്കറ്റിന്റെ വീഡിയോ പകർത്തിയിരുന്ന ക്യാമറാമാന്റെ കണ്ണിൽ വാമികയുടെ മുഖം ദൃശ്യമായത്. ഉടൻ തന്നെ ഇയാൾ കുഞ്ഞിന്റെ മുഖം ക്യാമറയിൽ പകർത്തി സമൂഹമാദ്ധ്യമങ്ങളിൽ ഉൾപ്പെടെ പോസ്റ്റ് ചെയ്തു. അമ്മ അനുഷ്കയുടെ കൈയ്യിൽ ഇരിക്കുന്ന കുഞ്ഞിന്റെ വീഡിയോയാണ് ക്യാമറാമാൻ പകർത്തിയത്.
സംഭവത്തെ തുടർന്ന് സമൂഹമാദ്ധ്യമങ്ങളിൽ വിമർശനങ്ങൾ ഉയരുകയാണ്. കുഞ്ഞിന്റെ സ്വകാര്യത മാനിച്ചാണ് അനുഷ്കയും കോഹ്ലിയും ഇതുവരെ വാമികയുടെ മുഖം വെളിപ്പെടുത്താതിരുന്നത്. അത് ആഗ്രഹിച്ചതിനാലാണ് മറ്റുള്ളവരോടും കുഞ്ഞിന്റെ മുഖം കാണുന്ന രീതിയിൽ ഫോട്ടോ എടുക്കരുതെന്ന് ഇരുവരും അഭ്യർത്ഥിച്ചത്. എന്നാൽ, ഇന്ന് ഈ ക്യാമറാമാൻ ചെയ്ത ഈ പ്രവൃത്തി തെറ്റാണെന്നാണ് ഭൂരിഭാഗം ആളുകളും അഭിപ്രായപ്പെടുന്നത്.
കുഞ്ഞിന്റെ സ്വകാര്യത മാനിക്കണമെന്ന് കോഹ്ലിയും, അനുഷ്കയും പലപ്പോഴായി മാദ്ധ്യമങ്ങളോട് ആവശ്യപ്പെട്ടിരുന്നു. എന്നാൽ ചിലരുടെ ഈ നിർബന്ധബുദ്ധി അതിരു കടക്കുന്നു എന്നും അഭിപ്രായങ്ങൾ ഉയരുന്നുണ്ട്. ഇപ്പോൾ തന്നെ കുഞ്ഞിന്റെ ചിത്രങ്ങൾ എവിടെയും പ്രദർശിപ്പിക്കാൻ ആഗ്രഹിക്കുന്നില്ലെന്നും, വാമിക വളർന്നു കഴിഞ്ഞാൽ, ഇത്തരത്തിൽ സമൂഹമാദ്ധ്യമങ്ങൾ കൈകാര്യം ചെയ്യാനും അവളുടെ ചിത്രങ്ങളും മറ്റും അവൾക്ക് പങ്കുവെയ്ക്കാമെന്നുമാണ് ഇരുവരും പറഞ്ഞിരുന്നത്.
