വെസ്റ്റ് ഇൻഡീസിനെതിരായ ഏകദിനത്തിൽ ഇന്ത്യൻ ടീമിനെ രോഹിത് ശർമ്മ തന്നെ നയിക്കും. പരിക്കേറ്റതിനെ തുടർന്ന് രോഹിത്തിന് ഫിറ്റ്നസ് ടെസ്റ്റിൽ ഹാജരാകേണ്ടി വന്നിരുന്നു. ബെംഗളൂരുവിലെ നാഷണൽ ക്രിക്കറ്റ് അക്കാദമിയിൽ നടന്ന ഫിറ്റ്നസ് പരിശോധനയിൽ വിജയിച്ച ശേഷമാണ് താരം ഏകദിനത്തിൽ ഇന്ത്യയെ നയിക്കാൻ പ്രാപ്തനാണെന്ന് തെളിഞ്ഞത്.
ഡിസംബറിലാണ് ഇന്ത്യയുടെ ഏകദിന ടീമിന്റെ സ്ഥിരം ക്യാപ്റ്റനായി രോഹിത് നിയമിതനായത്. അതിന് മുൻപ് തന്നെ ടി20 നായകായി താരം സ്ഥാനം ഏറ്റെടുത്തിരുന്നു. എന്നാൽ പുതിയ ചുമതല ഏറ്റെടുത്ത ശേഷം രോഹിത്തിന് ആദ്യ പരമ്പര നഷ്ടമായി. പരിക്കേറ്റതിനെ തുടർന്നാണ് ദക്ഷിണാഫ്രിക്കയ്ക്കെതിരായ ടെസ്റ്റ്-ഏകദിന പരമ്പരകൾ രോഹിത്തിന് നഷ്ടമായത്.
ഇപ്പോൾ, ഫിറ്റ്നസ് ടെസ്റ്റ് പാസായതോടെ വരാനിരിക്കുന്ന വെസ്റ്റ് ഇൻഡീസ് പരമ്പരയിൽ രോഹിത് ടീമിനെ നയിക്കുമെന്ന് ഉറപ്പായി. മൂന്ന് ഏകദിനവും, മൂന്ന് ടി20യും അടങ്ങുന്നതാണ് വെസ്റ്റ് ഇൻഡീസിനെതിരായ ഇന്ത്യൻ പര്യടനം. അടുത്തമാസം ആറ് മുതൽ 20 വരെയാണ് പരമ്പരകൾ നടക്കുന്നത്. കൊറോണ വ്യാപനത്തിന്റെ പശ്ചാത്തലത്തിൽ ഏകദിന മത്സരങ്ങൾ അഹമ്മദാബാദിലും ടി20 കൊൽക്കത്തയിലുമാണ് നടത്തുന്നത്.
