കൊല്ലം: എസ്എഫ്ഐയെ വിമർശിച്ച് സമൂഹമാദ്ധ്യമങ്ങളിൽ സ്റ്റാറ്റസിട്ട വിദ്യാർത്ഥിക്ക് ക്രൂരമർദ്ദനമേറ്റു. ചവറ ബിജെഎം കോളേജിലെ എസ്എസ്എഫ് പ്രവർത്തകനെയാണ് എസ്എഫ്ഐ പ്രവർത്തകർ മർദ്ദിച്ചത്.
കോളേജിനു പുറത്തുനിന്നെത്തിയ സംഘം മൂന്നാം വർഷ ബിരുദ വിദ്യാർത്ഥിയായ നസീമിനെ ക്രൂരമായി മർദിക്കുകയായിരുന്നു. ആക്രമണത്തിൽ പരിക്കേറ്റ വിദ്യാർത്ഥി ചവറ പ്രാഥമികാരോഗ്യ കേന്ദ്രത്തിൽ ചികിത്സ തേടി. ഇന്നലെ ഉച്ചയ്ക്കാണ് കോളേജിനു പുറത്തുനിന്നെത്തിയ രണ്ടുപേർ നസീമിനെ മർദിച്ചത്.
രണ്ടുപേർ വന്ന് കോളേജിലെ ഒഴിഞ്ഞ ക്ലാസ്മുറിയുടെ പിന്നിലേക്ക് വിദ്യാർത്ഥിയെ കൊണ്ടുപോകുകയും മൊബൈലിലെ ഒരു സ്റ്റാറ്റസ് സ്ക്രീൻഷോട്ട് കാണിക്കുകയും ചെയ്തു. തുടർന്ന് സ്റ്റാറ്റസ് താൻ തന്നെ ഇട്ടതാണോ എന്ന് ചോദിച്ചു. അതെയെന്നു വിദ്യാർത്ഥി പറഞ്ഞപ്പോൾ രണ്ടുപേരും ചേർന്ന് ശക്തമായി മർദിക്കുകയായിരുന്നു. ഇനിയും എസ്എഫ്ഐക്കെതിരെ എഴുതിയാൽ പരീക്ഷ എഴുതാൻ അനുവദിക്കില്ലെന്നും കോളേജിൽ പഠനം തുടരാനാകില്ലെന്നും ഭീഷണിപ്പെടുത്തിയതായി വിദ്യാർത്ഥി പറഞ്ഞു. വധഭീഷണിയുണ്ടായതായും പരാതിയുണ്ട്
Comments