വാസ്കോ ഡ ഗാമ: ഐ.എസ്.എല്ലിലെ ഇടവേളയ്ക്ക് ശേഷം കേരളാ ബ്ലാസ്റ്റേഴ്സ് വിജയക്കുതിപ്പ് തുടരാൻ ഇന്നിറങ്ങുന്നു. പന്ത്രണ്ടാം റൗണ്ട് മത്സരത്തിൽ എതിരാളി ബംഗളൂരു എഫ്.സിയാണ്. തിലക് മൈതാനത്ത് രാത്രി 7.30നാണ് മത്സരം. കൊറോണ ആശങ്ക നിലനിൽക്കേ ആരൊക്കെ ഇന്ന് കളത്തിലിറങ്ങും എന്നതിൽ ബ്ലാസ്റ്റേഴ്സ് കോച്ച് ഇവാൻ വുകോമനോവിച്ചിനും ആശങ്കയുണ്ട്.
ഇന്ന് ജയിച്ചാൽ പട്ടികയിലും നേട്ടമുണ്ടാകും.11 കളിയിൽ 20 പോയിന്റോടെ മൂന്നാം സ്ഥാനത്താണ് മഞ്ഞപ്പട. 10 കളിയിലും തോൽവി അറിയാതെയുള്ള മുന്നേറ്റം സർവ്വകാല നേട്ടവുമാണ്. കൊറോണ വ്യാപനം കാരണം മുംബൈ സിറ്റിക്കും എടികെ മോഹൻ ബഗാനുമെതിരായ ബ്ലാസ്റ്റേഴ്സിന്റെ മത്സരം മാറ്റിവയ്ക്കപ്പെട്ടിരുന്നു.
ഗ്രൂപ്പിൽ 13 കളിയിലായി 23 പോയിന്റോടെഹൈദരാബാദ് എഫ്.സിയാണ് മുന്നിൽ. 12 കളിയിൽ 22 പോയിന്റോടെ രണ്ടാം സ്ഥാനത്താണ്.
മാദ്ധ്യമ സമ്മേളനത്തിൽ ആരൊക്കെ കളത്തിലിറങ്ങും എന്നതിൽ കോച്ച് അവ്യക്തമായാണ് ഉത്തരം നൽകിയത്. താരങ്ങളിൽ പലരും കൊറോണ ബാധിതരാണെന്ന ഉത്തരം മാത്രമാണ് കോച്ച് നൽകിയത്. അങ്ങിനെയെങ്കിൽ പരിശീലനത്തിൽ ഉണ്ടാകുന്ന കുറവ് കളിയെ ബാധിക്കുമെന്ന മുൻകൂർജാമ്യ മെടുക്കാലാണിതെന്ന സൂചനയാണ് തരുന്നത്.
