തൃശൂര്: ടാര്പോളിന് കൊണ്ട് മറച്ചകുടിലിനു മുന്നില് നിന്ന് ദേശീയപതാക ഉയര്ത്തിയ കുടുംബത്തിന് കാരുണ്യത്തിന്റെ തണലൊരുങ്ങുന്നു. ചേര്പ്പ് ചെറുചേനം വെള്ളുന്ന പറമ്പില് അമ്മിണിയും പേരമക്കളുമാണ് റിപ്പബ്ലിക് ദിനത്തില് ദേശീയ പതാക ഉയര്ത്തി സല്യൂട്ട് ചെയ്തത്. ഇതിന്റെ വീഡിയോ സമൂഹമാധ്യമത്തില് തരംഗമായി. ഇതിനു പിന്നാലെ സഹായവാഗ്ദാനങ്ങളുമായി പലരുമെത്തി. സംവിധായകന് മേജര് രവി ഉള്പ്പെടെ ഒട്ടേറെ പേരാണ് സഹായഹസ്തം നീട്ടിയത്. വീട് പുതുക്കിപ്പണിതു നല്കാമെന്ന് മേജര് രവി ഉറപ്പുനല്കി.
റിപ്പബ്ലിക് ദിനത്തില് വീടുകളില് ദേശീയപതാക ഉയര്ത്താന് സിഎന്എന് സ്കൂളിലെ പ്രധാനാധ്യാപകന് എ.ആര്.പ്രവീണ്കുമാര്, വിദ്യാര്ത്ഥികള്ക്ക് നിര്ദ്ദേശം നല്കിയിരുന്നു. ഇതെ തുടര്ന്ന് ഈ സ്കൂളിലെ ഒന്പതാംക്ലാസ് വിദ്യാര്ത്ഥി വിവേക് ആണ് വീട്ടില് പതാകഉയര്ത്തണമെന്ന ആവശ്യമറിയിച്ചത്.
അമ്മൂമ്മയും പേരമക്കളും അതിന് തയ്യാറായി. അമ്മിണി പതാക ഉയര്ത്തുന്നത് കൊച്ചുമകള് ഫോണ്വീഡിയോയില് പകര്ത്തി. തുടര്ന്ന് അധ്യാപിക ആവശ്യപ്പെട്ടതനുസരിച്ച് വീഡിയോ അയച്ചുകൊടുത്തു. താമസിയാതെ വീഡിയോ വൈറലാവുകയും ഒട്ടേറെ പേര് നിരാലംബകുടുംബത്തിന്റെ രാജ്യസ്നേഹവും ദേശീയവികാരവും ഉള്ക്കൊളളുകയും ചെയ്തു. കൊച്ചുകുടിലിന്റെ ചിത്രം വീഡിയോയില് കണ്ടവര് പലരും സഹായവുമായി സമീപിച്ചു.
