ന്യൂഡൽഹി: ഇലക്ട്രിക് വാഹനങ്ങളുടെ ഉപയോഗം പ്രോത്സാഹിപ്പിക്കുമെന്ന് ധനമന്ത്രി നിർമ്മല സീതാരാമൻ. പരിസ്ഥിതി സൗഹൃദ ഇന്ധനങ്ങളും വാഹനങ്ങളും കേന്ദ്ര സർക്കാർ പ്രോത്സാഹിപ്പിക്കും. ഗ്രീൻ മൊബിലിറ്റി ഉറപ്പാക്കുന്നതിനായി ഇലക്ട്രിക് വാഹനങ്ങൾ പരമാവധി പ്രോത്സാഹിപ്പിക്കുമെന്നും ബജറ്റിൽ പ്രഖ്യാപിച്ചു.
ഇലക്ട്രിക് വാഹനങ്ങളുടെ ഉപയോഗം പ്രോത്സാഹിപ്പിക്കുന്നതിനായി ബാറ്ററി സ്വാപ്പിംഗ് സംവിധാനം കൊണ്ടുവരാൻ കേന്ദ്രം പുതിയ നയം അവതരിപ്പിക്കും. കേന്ദ്ര സർക്കാരിന്റെ ലക്ഷ്യങ്ങൾ കൈവരിക്കുന്നതിനായി ഇവി ഇൻഫ്രാസ്ട്രക്ചറും, ഇവി ഇക്കോസിസ്റ്റവും വർദ്ധിപ്പിക്കുന്നതിനുള്ള സംരംഭങ്ങൾ ശക്തമാക്കുമെന്നും ധനമന്ത്രി പറഞ്ഞു. രാജ്യത്ത് ഇവി ചാർജിംഗ് സ്റ്റേഷനുകൾ വർദ്ധിപ്പിക്കുന്നതിലൂടെ കൂടതൽ ആളുകൾ ഇലക്ട്രിക് വാഹനത്തിന്റെ ഉപയോഗത്തിലേയ്ക്ക് തിരിയും എന്നും ധനമന്ത്രി വ്യക്തമാക്കി.
ഇലക്ട്രിക് വാഹനങ്ങളിലുള്ള ബാറ്ററികൾ ചാർജ്ജ് ചെയ്യുന്നതിന്റെ സമയം ലാഭിക്കാനും, നഗര പ്രദേശങ്ങളിലെ സ്ഥലപരിമിതി കണക്കിലെടുത്ത് ബാറ്ററി സ്വാപ്പിംഗ് എന്ന സംവിധാനം കൊണ്ടുവരുമെന്നാണ് ധനമന്ത്രിയുടെ പ്രഖ്യാപനം. ഇലക്ട്രിക് വാഹനങ്ങളുടെ ചാർജിംഗ് സംവിധാനം കാര്യക്ഷമമാക്കുന്നതിന് പുറമെ, ഇത്തരം വാഹനങ്ങളുടെ ബാറ്ററി കൈമാറ്റം ചെയ്യുന്നതിനുള്ള നയവും കേന്ദ്രസർക്കാർ ആവിഷ്കരിക്കും.
ചാർജിംഗ് കേന്ദ്രങ്ങൾ ഒരുക്കാനുള്ള സ്ഥല പരിമിതിയുള്ള പ്രദേശങ്ങളിലായിരിക്കും ബാറ്ററി സ്വാപ്പിംഗ് സംവിധാനം വരുത്തുക. ബാറ്ററി മാറ്റുന്നതിനുള്ള നയം ഇന്റർ ഓപ്പറബിലിറ്റി മാനദണ്ഡങ്ങളോടെയായിരിക്കും ആവിഷ്കരിക്കുക. ഇലക്ട്രിക് വാഹനങ്ങൾക്കായുള്ള ബാറ്ററികൾ നിർമിക്കുന്നതിനും ഊർജം ഉത്പാദിപ്പിക്കുന്നതിനുമായി സ്വകാര്യ കമ്പനികളെ പ്രോത്സാഹിപ്പിക്കാനും കേന്ദ്ര സർക്കാരിന് പദ്ധതിയുണ്ട്.
Comments