കായംകുളം: വിവാഹപിറ്റേന്ന് വരൻ വധുവിനെ ഉപേക്ഷിച്ച് കടന്ന് കളഞ്ഞതായി പരാതി.വിവാഹം കഴിഞ്ഞ് സ്വർണവും പണവുമായാണ് വരൻ കടന്നുകളഞ്ഞത്. കായംകുളം ഫയർ സ്റ്റേഷന് സമീപം തെക്കേടത്ത് തറയിൽ റഷീദിന്റെയും ഷീജയുടേയും മകനായ അസ്റുദ്ദീനെതിരെയാണ് പരാതി.
അടൂർ പഴകുളം സ്വദേശിനിയെ കബളിപ്പിച്ച് സ്വർണവും പണവുമായി വിവാഹപിറ്റേന്ന് കടന്നുകളഞ്ഞെന്നാണ് യുവതിയുടെ കുടുംബം നൽകിയിരിക്കുന്ന പരാതി. പരാതിയുടെ അടിസ്ഥാനത്തിൽ കായംകുളം പോലീസ് യുവാവിനെതിരെ വിശ്വാസ വഞ്ചനയ്ക്ക് കേസെടുത്തു.
കഴിഞ്ഞ ജനുവരി 30ന് ആദിക്കാട്ടുകുളങ്ങര എസ് എച്ച് ഓഡിറ്റോറിയത്തിൽ വെച്ചാണ് ഇരുവരുടെയും വിവാഹം നടന്നത്. ഇരു ജമാഅത്തുകളുടെയും കാർമികത്വത്തിൽ അസ്റുദ്ദീനും പഴകുളം സ്വദേശിനിയുമായുള്ള വിവാഹം മതാചാര പ്രകാരമാണ് നടന്നത്.
തുടർന്ന് വരനും വധുവും വധുവിന്റെ വീട്ടിലെത്തി. 31 ന് പുലർച്ചെ മൂന്നു മണിയോടെ സുഹൃത്തിന് ഒരു അപകടം പറ്റിയെന്നും ആലപ്പുഴ വണ്ടാനം മെഡിക്കൽ കോളജിലേക്ക് അയാളെ കൊണ്ടു പോകണമെന്നും പറഞ്ഞാണ് അസറുദ്ദീൻ പഴകുളത്തെ വധൂഗൃഹത്തിൽ നിന്നും പുറത്ത് പോയത്. വരനെ തടയാൻ ശ്രമിച്ചെങ്കിലും തന്റെ ഏറ്റവും അടുത്ത സുഹൃത്താണെന്ന് പറഞ്ഞ് പുറപ്പെടുകയായിരുന്നുവെന്ന് കുടുംബം ആരോപിക്കുന്നു.
മണിക്കൂറുകൾക്ക് ശേഷം വരന്റെ ഫോൺ സ്വിച്ച് ഓഫ് ആയി. തുടർന്ന് നടത്തിയ പരിശോധനയിലാണ് 30 പവന്റെ ആഭരണങ്ങളിൽ പകുതിയും 2.75 ലക്ഷം രൂപയും നഷ്ടപ്പെട്ടതായി തിരിച്ചറിഞ്ഞത്. അന്വേഷണത്തിൽ അസറുദ്ദീൻ ഇതിന് മുൻപ് മറ്റൊരു വിവാഹം കഴിച്ചതായി കണ്ടെത്തി.ഈ വിവാഹത്തെ കുറിച്ചു അറിയില്ലായിരുന്നുവെന്നാണ് വരന്റെ മാതാപിതാക്കൾ വധുവിന്റെ വീട്ടുകാരോട് പറഞ്ഞത്
