യുഎഇ: മുഖ്യമന്ത്രി പിണറായി വിജയനെ സന്ദർശിച്ച് നടൻ ഉണ്ണി മുകുന്ദൻ. ദുബായ് എക്സപോയിൽ തന്റെ പുതിയ ചിത്രമായ മേപ്പടിയാന്റെ പ്രദർശനവുമായി ബന്ധപ്പെട്ട് എത്തിയതായിരുന്നു താരം. ഇതിനിടയിലാണ് ഉണ്ണി മുഖ്യമന്ത്രിയുമായി കൂടിക്കാഴ്ച നടത്തിയത്. ഫേസ്ബുക്ക് പോസ്റ്റിലൂടെയാണ് മുഖ്യമന്ത്രിയെ സന്ദർശിച്ച കാര്യം താരം ആരാധകരെ അറിയിച്ചത്.
ദുബായിൽ സന്ദർശനത്തിനെത്തിയപ്പോൾ അവിടെ വെച്ച് മുഖ്യമന്ത്രി പിണറായി വിജയനെ കാണാൻ സാധിച്ചുവെന്നും അദ്ദേഹവുമായി ഒരുപാട് വിഷയങ്ങൾ ചർച്ച ചെയ്തുവെന്നും ഉണ്ണി പറഞ്ഞു. മുഖ്യമന്ത്രിക്കൊപ്പം പ്രഭാത ഭക്ഷണവും കഴിച്ച ശേഷമാണ് താരം മടങ്ങിയത്.
മുഖ്യമന്ത്രിയുമായുള്ള കൂടിക്കാഴ്ചയ്ക്ക് അവസരം ഒരുക്കി നൽകിയ മാദ്ധ്യമപ്രവർത്തകനും എംപിയുമായ ജോൺ ബ്രിട്ടാസിനും നന്ദി പറയുന്നുണ്ട് താരം. സമയം കിട്ടിയാൽ മേപ്പടിയാൻ സിനിമ കാണാം എന്ന് ബ്രിട്ടാസ് ഉറപ്പ് നൽകിയതായി ഉണ്ണി മുകുന്ദൻ ഫേസ്ബുക്കിൽ കുറിച്ചു. പോസ്റ്റ് ചെയ്ത് മിനിറ്റുകൾക്കുള്ളിൽ തന്നെ ചിത്രം വൈറലായി മാറിയിരിക്കുകയാണ്.
ഉണ്ണി മുകുന്ദൻ നായകനായ മേപ്പടിയാൻ ദുബായ് എക്സ്പോയിൽ പ്രദർശിപ്പിക്കാനൊരുങ്ങുകയാണ്. എക്സ്പോയിലെ ഇന്ത്യ പവലിയനിൽ ദ് ഫോറം ലെവൽ 3ൽ ആണ് പ്രദർശനം. ദുബായ് എക്സ്പോയിൽ പ്രദർശിപ്പിക്കുന്ന ആദ്യ മലയാള സിനിമയാണ് മേപ്പടിയാൻ.ഫെബ്രുവരി 6ന് വൈകിട്ട് 5 മണിക്കാണ് സിനിമയുടെ പ്രദർശനം ആരംഭിക്കുക.
