തിരുവനന്തപുരം: സ്വർണ്ണക്കടത്ത് കേസ് പ്രതി സ്വപ്ന സുരേഷിന്റെ വെളിപ്പെടുത്തൽ ശരിവെച്ച് എൻഫോഴ്സ്മെന്റ് ഡയറക്ടറേറ്റ്. സ്വപ്നയുടെ വെളിപ്പെടുത്തലുകൾ ഇഡി ഉദ്യോഗസ്ഥർ പരിശോധിക്കുകയാണ്. ശബ്ദസന്ദേശം ആസൂത്രിതമാണെന്ന് സ്വപ്ന നേരത്തെ മൊഴി നൽകിയിരുന്നതായി ഇഡി പറഞ്ഞു. ഇക്കാര്യം കോടതിയിലും ചൂണ്ടിക്കാട്ടിയിട്ടുണ്ടെന്ന് എൻഫോഴ്സ്മെന്റ് ഡയറക്ട്രേറ്റ് അറിയിച്ചു.
എൻഫോഴ്സ്മെന്റിന്റെ കസ്റ്റഡിയിലിരിക്കെ പുറത്തുവന്ന ശബ്ദസന്ദേശം കെട്ടിച്ചമച്ചതാണെന്നാണ് സ്വപ്ന സുരേഷ് വെളിപ്പെടുത്തിയത്. സ്വപ്നയുടെ വെളിപ്പെടുത്തലുകൾ ഹൈക്കോടതിയെ അറിയിക്കുന്നതും കേന്ദ്ര ഏജൻസികളുടെ പരിഗണനയിലുണ്ട്. കേന്ദ്ര ഏജൻസികൾക്കെതിരെ ജുഡീഷ്യൽ അന്വേഷണം ആവശ്യപ്പെട്ട് സർക്കാർ അപ്പീൽ നൽകിയിരുന്നു. ഈ സാഹചര്യത്തിൽ സ്വപ്നയുടെ വെളിപ്പെടുത്തലുകൾ അപ്പീലിൽ അറിയിക്കാനാണ് കേന്ദ്ര ഏജൻസികൾ ആലോചിക്കുന്നത്.
സ്വർണ്ണ കടത്തിന് പിന്നിൽ കൂടുതൽ പേരുണ്ടെന്ന സ്വപ്നയുടെ വെളിപ്പെടുത്തലും കസ്റ്റംസ് പരിശോധിക്കും. സ്വപ്നയുടെ രഹസ്യമൊഴിയിൽ സുപ്രധാന വിവരങ്ങളുണ്ടെന്ന് നേരത്തെ കേന്ദ്ര ഏജൻസികൾ വ്യക്തമാക്കിയിരുന്നു. ശിവശങ്കറിന്റെ അശ്വത്ഥാമാവ് വെറും ആന എന്ന പുസ്തകത്തിലെ പ്രധാന ഭാഗങ്ങൾ പുറത്തുവന്നതിന് പിന്നാലെയാണ് വെളിപ്പെടുത്തലുമായി സ്വപ്ന സുരേഷും എത്തിയത്. സ്വപ്ന തന്നെ ചതിച്ചതാണെന്നും സ്വർണ്ണ കടത്തിനെ കുറിച്ച് അറിയില്ലെന്നുമാണ് ശിവശങ്കർ പുസ്തകത്തിൽ പറയുന്നത്.
