ന്യൂഡൽഹി: പ്രിയപ്പെട്ട നേതാവ് എന്നും പ്രധാനമന്ത്രി നരേന്ദ്രമോദിയാണെന്ന് ഇന്ത്യൻ വനിതാ ഏകദിന, ടെസ്റ്റ് ക്രിക്കറ്റ് ടീം ക്യാപ്റ്റൻ മിതാലി രാജ്. ട്വിറ്ററിൽ ആരാധകരുമായുള്ള സംഭാഷണത്തിനിടെയാണ് മിതാലി രാജിന്റെ വെളിപ്പെടുത്തൽ. ട്വിറ്ററിൽ ആരാധകരുമായി ചോദ്യോത്തര വേള സംഘടിപ്പിക്കുകയും രസകരമായ ചോദ്യങ്ങൾക്ക് മിതാലി രാജ് മറുപടി നൽകുകയും ചെയ്തിരുന്നു.
പ്രതമേശ് ബരാഹ് എന്ന യുവാവ് ചോദിച്ച ചോദ്യത്തിന് മറുപടി നൽകുകയായിരുന്നു മിതാലി രാജ്. ‘നിങ്ങളുടെ പ്രിയപ്പെട്ട നേതാവ് ആരാണെന്നായിരുന്നു ഇയാളുടെ ചോദ്യം. ‘നമ്മുടെ ബഹുമാന്യനായ പ്രധാനമന്ത്രി നരേന്ദ്രമോദി ജി’ എന്ന് മിതാലി രാജ് മറുപടി നൽകുകയും ചെയ്തു. പ്രധാനമന്ത്രിയെ ടാഗ് ചെയ്താണ് മിതാലി ഇക്കാര്യം കുറിച്ചത്. ആരാധകരുമായുള്ള സംഭാഷണത്തിനിടെ നിരവധി ചോദ്യങ്ങളാണ് മിതാലിയെ തേടിയെത്തിയത്.
Our hon'ble Prime Minister Shri @narendramodi ji https://t.co/XwXkzhd4QT
— Mithali Raj (@M_Raj03) February 5, 2022
പ്രിയപ്പട്ട പുരുഷ, വനിതാ ക്രിക്കറ്റ് താരങ്ങൾ ആരാണെന്നായിരുന്നു ഒരാൾ ചോദിച്ചത്. പുരുഷ വിഭാഗത്തിൽ സച്ചിൽ തെണ്ടുൽക്കർ, മൈക്കൽ ബെവൻ, റിക്കി പോണ്ടിംഗ്, ജസ്പ്രീത് ബുംറ എന്നിവരുടെ പേരാണ് മിതാലി പറഞ്ഞത്. വനിതാ വിഭാഗത്തിൽ കാരെ റോൾട്ടൺ, നീതു ഡേവിഡ്, കാതറിൻ ബ്രണ്ട്, മെഗ് ലാനിംഗ് എന്നിവരുടെ പേരും മിതാലി പറഞ്ഞു.
ക്രിക്കറ്റ് അല്ലായിരുന്നെങ്കിൽ നിങ്ങൾ ഏത് മേഖലയിലായിരിക്കും ശോഭിക്കുക എന്നായിരുന്നു ഒരാൾ ചോദിച്ചത്. ഭരതനാട്യ നർത്തകി അല്ലെങ്കിൽ ഒരു സിവിൽ സർവ്വീസ് ഉദ്യോഗസ്ഥ എന്നാണ് മിതാലി മറുപടി നൽകിയത്. ഇഷ്ടപ്പെട്ട ഭക്ഷണം, സ്ഥലം, സിനിമ, എന്നിങ്ങനെ നിരവധി ചോദ്യങ്ങളും ആരാധകർ മിതാലിയോട് ചോദിച്ചു. ഇതിനെല്ലാം തന്നെ താരം മറുപടി നൽകുകയും ചെയ്തിട്ടുണ്ട്.
