അൽബാനി: ഗാന്ധിപ്രതിമ തകർത്ത നിലയിൽ കണ്ടെത്തി. ന്യൂയോർക്കിലെ മാൻഹട്ടനിനടുത്തുള്ള യൂണിയൻ സ്ക്വയറിലെ പ്രതിമയാണ് തകർന്ന നിലയിൽ കണ്ടെത്തിയത്. ഇന്ന് രാവിലെ പ്രദേശത്ത് എത്തിയവരാണ് പ്രതിമയെ തകർന്ന നിലയലിൽ കണ്ടത്തുന്നത്. സംഭവത്തെ ഇന്ത്യ ശക്തമായ അപലപിച്ചു.
ഗാന്ധി പ്രതിമ തകർത്ത സംഭവം ഒരിക്കലും അംഗീകരിക്കാനാകില്ലെന്നും ഗൗരവമുള്ള വിഷയമാണെന്നും ന്യൂയോർക്കിലെ ഇന്ത്യൻ കോൺസുലേറ്റ് ജനറൽ പറഞ്ഞു. വിഷയത്തിൽ പ്രദേശിക അധികാരികളോടും യുഎസ് സ്റ്റേറ്റ് ഡിപ്പാർട്ട്മെന്റിനോടും വിശദീകരണം തേടിയിട്ടുണ്ട്.
എട്ട് അടി നീളമുള്ള ഗാന്ധിയുടെ പ്രതിമയാണ് അജ്ഞാതർ തകർത്തത്. ഒരിക്കലും അംഗീകരിക്കാനാകാത്ത ഈ പ്രവൃത്തിക്ക് ഉത്തരവാദികളായവരെ ഉടൻ കണ്ടെത്തണമെന്നും അവർക്കെതിരെ ഉചിതമായ നടപടി സ്വീകരിക്കണമെന്നും കോൺസുലേറ്റ് ജനറൽ ആവശ്യപ്പെട്ടു.
സംഭവത്തിൽ അന്വേഷണം ആരംഭിച്ചതായി പ്രദേശിക ഭരണകൂടം അറിയിച്ചിട്ടുണ്ട്. ഗാന്ധിജിയുടെ 117-ാം ജന്മവാർഷികത്തോട് അനുബന്ധിച്ച് ഗാന്ധി മെമ്മോറിയൽ ഇന്റർനാഷണൽ ഫൗണ്ടേഷൻ സമർപ്പിച്ചതാണ് ഈ പ്രതിമ.
