പനാജി: നിയമസഭാ തെരഞ്ഞെടുപ്പിന് മുന്നോടിയായി വടക്കൻ ഗോവയിലെ വിവിധ പ്രദേശങ്ങളിലെ ജനങ്ങളെ പ്രധാനമന്ത്രി നരേന്ദ്ര മോദി ഇന്ന് അഭിസംബോധന ചെയ്യും. വൈകിട്ട് 4.30ന് വെർച്വലായാണ് അദ്ദേഹം ജനങ്ങളെ അഭിസംബോധന ചെയ്യുന്നത്. കൂടാതെ, നിയമസഭാ തെരഞ്ഞെടുപ്പിനുള്ള ബിജെപി പ്രകടനപത്രിക കേന്ദ്ര ഗതാഗതമന്ത്രി നിതിൻ ഗഡ്കരി ഇന്ന് പ്രകാശനം ചെയ്യും.
വടക്കൻ ഗോവ ജില്ലയിലെ 20 നിയമസഭാ മണ്ഡലങ്ങളിലെ പാർട്ടി പ്രവർത്തകരെയും, പൊതു ജനങ്ങളെയുമാണ് പ്രധാനമന്ത്രി അഭിസംബോധന ചെയ്യുന്നത്. കൊറോണ വ്യാപനത്തിന്റെ പശ്ചാത്തലത്തിൽ വലിയ രീതിയിലുള്ള റാലികൾ തെരഞ്ഞെടുപ്പ് കമ്മീഷൻ നിരോധിച്ചിരുന്നു. അതിനാൽ ജനങ്ങളുടെ ആരോഗ്യം മുൻനിർത്തിയാണ് ബിജെപി വെർച്വൽ റാലി സംഘടിപ്പിക്കുന്നത്. കൂടാതെ, വെർച്വൽ റാലി നടക്കുന്ന ഓരോ മണ്ഡലങ്ങളിലും പ്രധാനമന്ത്രിയും സംഭാഷണം എൽഇഡി സ്ക്രീനിൽ സംപ്രേക്ഷണം ചെയ്യും എന്ന് ബിജെപി നേതാക്കൾ അറിയിച്ചു.
അതേസമയം, ഉത്തർപ്രദേശ് നിയമസഭാ തെരഞ്ഞെടുപ്പ് പ്രകടനപത്രികയും ബിജെപി ഇന്ന് പ്രഖ്യാപിക്കും. ലക്നൗവിലെ പാർട്ടി ഓഫീസിൽ കേന്ദ്ര ആഭ്യന്തരമന്ത്രി അമിത് ഷാ ഉത്തർപ്രദേശിലെ ബിജെപി പ്രകടന പത്രിക പുറത്തിറക്കും. ഫെബ്രുവരി 14നാണ് ഗോവയിൽ തെരഞ്ഞെടുപ്പ് നടക്കുന്നത്. നാൽപത് മണ്ഡലങ്ങളിലേക്ക് നടക്കുന്ന തെരഞ്ഞെടുപ്പിന്റെ ഫലം മാർച്ച് 10ന് പ്രഖ്യാപിക്കും.
Comments