അന്തരിച്ച പ്രിയ ഗായിക ലതാമങ്കേഷ്കറുടെ ഓർമ്മകളിലാണ് ഭാരതീയർ. സ്വരമാധുര്യം കൊണ്ട് മനസ് കീഴടക്കിയ പ്രിയ ഗായികയുടെ വേർപാട് ഇന്നും ഉൾക്കൊള്ളാൻ പലർക്കും സാധിച്ചിട്ടില്ല. പാടിയ പാട്ടുകളിലൂടെ ഗാനകോകിലം ഇന്നും ജനമനസ്സുകളിലൂടെ ജീവിക്കുകയാണ്.
ലതാജിയുടെ കടുത്ത ആരാധകനാണ് ഡൽഹി സ്വദേശിയായ വിജയ്. മെഹന്ദി കലാകാരനായ അദ്ദേഹം തന്റേതായ രീതിയിൽ പ്രിയഗായികയ്ക്ക് ആദരവ് അർപ്പിച്ചിരിക്കുകയാണ്.തന്റെ ഭാര്യയുടെ കൈകളിൽ മെഹന്തി കൊണ്ട് ലതാജിയുടെ ഛായാചിത്രം വരച്ചു കൊണ്ടാണ് അദ്ദേഹം ആദരം പ്രകടമാക്കിയത്.
ലതാജിക്ക് ആദരാഞ്ജലി അർപ്പിച്ചുക്കൊണ്ട് അദ്ദേഹം മെഹന്തിയിടുന്നതിന്റെ ദൃശ്യങ്ങൾ ഇപ്പോൾ സോഷ്യൽ മീഡിയയിൽ വൈറലായി മാറികഴിഞ്ഞു. വീഡിയോയിൽ ഫോണിലുള്ള ലതാജിയുടെ ചിത്രം നോക്കി വിജയ് ഭാര്യയുടെ കൈവെള്ളയിൽ മെഹന്തിയിടുന്നത് കാണാം. ചിത്രം പൂർത്തിയാക്കിയതിന് ശേഷം മെഹന്തി കൊണ്ട് തന്നെ ഗായികയ്ക്ക് വേണ്ടി ‘RIP’ എന്ന് എഴുതി ചേർക്കുന്നുണ്ട്.
ശബ്ദത്തിന്റെ രാജ്ഞിയ്ക്ക് നിത്യശാന്തി! ലതാ മങ്കേഷ്കർ ഞങ്ങളുടെ ഹൃദയത്തിൽ എക്കാലവും ജീവിക്കും’ എന്ന കുറിപ്പ് ചേർത്താണ് അദ്ദേഹം വീഡിയോ പങ്ക് വെച്ചിരിക്കുന്നത്. വീഡിയോയുടെ പശ്ചാത്തലത്തിൽ ലത മങ്കേഷറിന്റെ ഏറ്റവും ജനപ്രിയ ഗാനങ്ങളിലൊന്നായ ‘ലഗ് ജാ ഗലേ’ കേൾക്കാം. സോഷ്യൽ മീഡിയയിലൂടെ ഗായികയ്ക്ക് ലഭിച്ച ഏറ്റവും വലിയ ആദരവ് എന്നാണ് പലരും മെഹന്ദി ഡിസൈനെ വിശേഷിപ്പിച്ചത്.
