മലപ്പുറം: മദ്യലഹരിയിൽ മകൻ അച്ഛനെ അടിച്ചു കൊലപ്പെടുത്തി. നിലമ്പൂർ എടക്കരയിലാണ് സംഭവം. ചുങ്കത്തറ പളളിക്കുത്ത് സ്വദേശി തങ്കച്ചൻ (70) ആണ് കൊല്ലപ്പെട്ടത്. തങ്കച്ചന്റെ മകൻ കൊച്ചുമോൻ എന്ന വർഗീസിനെ (42) പോലീസ് സംഭവസ്ഥലത്ത് നിന്നും അറസ്റ്റ് ചെയ്തു.
സ്വത്ത് തർക്കമാണ് കൊലപാതകത്തിലേയ്ക്ക് നയിച്ചതെന്ന് പോലീസ് പറയുന്നു. തലയ്ക്ക് വടി കൊണ്ടുള്ള അടിയേറ്റതാണ് മരണകാരണം. സ്വത്ത് തർക്കത്തെ തുടർന്ന് ഇവരുടെ വീട്ടിൽ അച്ഛനും മകനും തമ്മിൽ സംഘർഷം പതിവായിരുന്നു എന്നാണ് നാട്ടുകാർ പറയുന്നത്.
തലക്കേറ്റ മുറിവിൽ നിന്നും രക്തം വാർന്നാണ് മരിച്ചത്. അരമണിക്കൂർ നേരം രക്തം വാർന്ന് കിടന്ന തങ്കച്ചനെ നാട്ടുകാരെത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തങ്കച്ചന്റെ മൃതദേഹം നിലമ്പൂർ ജില്ലാ ആശുപത്രി മോർച്ചറിയിലേക്ക് മാറ്റി.
