രാജ്‌കോട്ട്: രഞ്ജിട്രോഫിയിൽ കേരളത്തിന് ജയം. മേഘാലയക്കെതിരെ ഇന്നിംഗ്‌സ് ജയമാണ് കേരളം നേടിയത്. മൂന്ന് പേരുടെ സെഞ്ച്വറികളുടെ ബലത്തിൽ കേരളത്തിന്റെ ഒന്നാം ഇന്നിംഗ്‌സ് സ്‌കോറായ ഒൻപതിന് 505 പ്രതിരോധിക്കാൻ മേഘാലയയ്‌ക്കായില്ല. കേരളത്തിന്റെ കൂറ്റൻ സ്‌കോറിനെതിരെ മേഘാലയയുടെ ഒന്നാം ഇന്നിംഗ്‌സ് 148ൽ അവസാനിച്ചിരുന്നു. രണ്ടാം ഇന്നിംഗ്‌സിൽ 191 റൺസിൽ മേഘാലയ ടീമിലെ എല്ലാ വരും പുറത്തായി.
കേരളത്തിനായി രണ്ടാം ഇന്നിംഗ്‌സിൽ നാല് വിക്കറ്റ് നേടിയ ബേസിൽ തമ്പിയാണ് മേഘാലയയെ തകർത്തത്. ആദ്യ ഇന്നിംഗ്‌സിൽ നാല് വിക്കറ്റ് വീഴ്‌ത്തിയ ഏദനും ജല്ജ് സക്‌സേനയും ഈരണ്ട് വിക്കറ്റുകൾ വീതം വീഴ്‌ത്തി. മനു കൃഷ്ണൻ ഒരു വിക്കറ്റ് വീഴ്‌ത്തി. ആദ്യ ഇന്നിംഗ്‌സിൽ രണ്ടു വിക്കറ്റ് വീഴ്‌ത്തിയ ശ്രീശാന്തിന് രണ്ടാം ഇന്നിംഗ്‌സിൽ വിക്കറ്റ് ലഭിച്ചില്ല.
ബാറ്റിംഗിൽ കേരളം മേഘാലയ്‌ക്ക് മേൽ സമ്പൂർണ്ണ ആധിപത്യമാണ് നേടിയത്. പി.രാഹുൽ(147), രോഹൻ കുന്നുമ്മൽ(107), വത്സൻ ഗോവിന്ദ്(107) എന്നിവരുടെ സെഞ്ച്വറികളാണ് സ്‌കോർ 505ലേക്ക് എത്തിച്ചത്. സച്ചിൻ ബേബി 56 റൺസ് എടുത്തു. മേഘാലയ്‌ക്കായി ഖുരാന, ആര്യൻ എന്നിവർ മൂന്ന് വിക്കറ്റ് വീതം വീഴ്‌ത്തി.
