മലപ്പുറം: മലപ്പുറം പുത്തനത്താണിയിലെ ഏഴ് വയസുകാരന്റെ മരണം ഷിഗല്ല മൂലമെന്ന് സംശയം. വെള്ളിയാഴ്ചയാണ് ഏഴ് വയസുകാരൻ മരിച്ചത്. കോഴിക്കോട് സ്വകാര്യ ആശുപത്രിയിലായിരുന്നു അന്ത്യം. ഡയേറിയയെ തുടർന്നായിരുന്നു കുട്ടിയെ ആശുപത്രിയിൽ പ്രവേശിപ്പിരുന്നത്. ഷിഗല്ലയെന്ന് സംശയിക്കുന്നതിന്റെ പശ്ചാത്തലത്തിൽ ദ്രുതപ്രതികരണ സംഘം മലപ്പുറത്ത് പ്രതിരോധ നടപടികൾ ശക്തമാക്കി.
നിലവിൽ സാമ്പിൾ പരിശോധനയ്ക്കായുള്ള ശ്രമങ്ങളാണ് നടക്കുന്നത്. ഷിഗല്ലയുടെ ലക്ഷണങ്ങളോടെയാണ് കുട്ടി മരിച്ചതെന്നതിനാലാണ് നടപടി. പരിശോധാഫലം പുറത്തുവന്നതിന് ശേഷമേ ഷിഗല്ലയാണെന്ന് സ്ഥിരീകരിക്കൂവെന്ന് ഡിഎംഒ അറിയിച്ചു. കുട്ടിയുടെ സ്വദേശമായ പുത്തനത്താണിയിൽ പ്രത്യേക പരിശോധനയും ആരംഭിച്ചിട്ടുണ്ട്. ജനങ്ങൾ ജാഗ്രത പുലർത്തണമെന്നാണ് ആരോഗ്യവകുപ്പിന്റെ നിർദേശം.
