മോഹൻലാൽ ചിത്രം ആറാട്ടിനെതിരെ വ്യാജ പ്രചാരണം നടത്തിയവർക്കെതിരെ കേസെടുത്ത് പോലീസ്. വ്യാജപ്രചാരണം നടത്തിയ അഞ്ച് പേർക്കെതിരെയാണ് പോലീസ് കേസെടുത്തിരിക്കുന്നത്. മലപ്പുറം കോട്ടക്കലിലെ തീയേറ്റർ ഉടമയാണ് പോലീസിൽ പരാതി നൽകിയത്. സമൂഹമാദ്ധ്യമങ്ങളിലൂടെ സിനിമയ്‌ക്കെതിരെ വ്യാജപ്രചാരണം നടത്തിയെന്ന് തീയേറ്റർ ഉടമ പരാതിയിൽ പറയുന്നു. കഴിഞ്ഞ ദിവസമാണ് ആറാട്ട് റിലീസിനെത്തിയത്.
സിനിമയെ തകർക്കാൻ മനഃപ്പൂർവ്വം സോഷ്യൽ മീഡിയയിലൂടെ വ്യാജപ്രചാരണങ്ങൾ നടക്കുന്നുവെന്ന് പരാതിയിൽ തീയേറ്റർ ഉടമ ആരോപിക്കുന്നു. 18നാണ് ചിത്രം റിലീസ് ചെയ്തത്. മികച്ച പ്രതികരണം നേടിയ ചിത്രത്തെ പ്രശംസിച്ച് നിരവധി പേരാണ് എത്തിയത്. ഇതിനിടെയാണ് സിനിമയ്‌ക്കെതിരെ വ്യാജ പ്രചാരണങ്ങളും പുറത്തുവന്നത്. ഇത് ശ്രദ്ധയിൽപ്പെട്ട തീയേറ്റർ ഉടമ പോലീസിൽ പരാതി നൽകുകയായിരുന്നു.
വില്ലൻ എന്ന ചിത്രത്തിന് ശേഷം ബി ഉണ്ണികൃഷ്ണൻ മോഹൻലാലിനെ നായകനാക്കി ഒരുക്കിയ ചിത്രമാണ് ആറാട്ട്. ഉദയകൃഷ്ണയാണ് തിരക്കഥ ഒരുക്കിയിരിക്കുന്നത്. നെയ്യാറ്റിൻകര ഗോപൻ എന്ന കഥാപാത്രമായാണ് മോഹൻലാൽ ചിത്രത്തിൽ എത്തുന്നത്. ശ്രദ്ധ ശ്രീനാഥ് ആണ് മോഹൻലാലിന്റെ നായികയായി എത്തുന്നത്. സിനിമയെ ഇരുകൈയ്യും നീട്ടി സ്വീകരിച്ച പ്രേക്ഷകർക്ക് നന്ദി അറിയിച്ച് മോഹൻലാലും എത്തിയിരുന്നു.
